ALIYU SÀLL, GII MARYIIS SAAÑA : KUMBA AM NDEY AK KUMBA AMUL NDEY

Bërki-démb rekk la fi OXFAM jéem a dooleel boroom ñaari tur yi, Elimaan Abi Kan ma fay liggéeye ne du ci dal, ñu bare ànd ceek moom. Noonu la daane OXFAM ma ko doon waaj a dellooy kayitam. 

Ñu jóge ca, beneen jéyya dal ci kow réew mi te mooy Gii Maryiis Saaña mi ñu ni ràpp ci kaso bi tëj. Ci li yoon wax, Gii dafa ni Frãs a ngi waaj a làqu song Senegaal, jaarale ko  ci defkatu ñaawteef yooyu ñu tudde terórist. Waaw. Looloo tax àttekat bi yabal takk-der yi Jëppël, ñu fekk fa Gii Maryiis Saaña yóbbu. 

Li njëkk a teey xel ci mbir mi moo di ne ndaje mi ñu wax ni fa la baat yooyu jibe, Gii ci boppam jëlu fa kàddu, joxewul xalaatam. Bu loolu weesoo, Gii du njiitu kurél gi ñu duppe FRAPP/France dégage

Kon lan la ko yoon toppe ? Li kéemaane te xaw a reelu sax, moo di ne yoon ci boppam xamu ci dara ba dara booloo jeex ! Àttekat bi daal, toog nay fan di seet lan la war a teg ci loxo askan wi.

Ayu-bés yi jiitu lii, Gii metitlu woon na bu baax ni yaakaaru ndawi Senegaal yi tase, Nàññ gornmaa Maki Sàll, wax li mu xalaat ci coowal petorol ak gaas bi lëmbe réew mi.

Yu ni mel moo waraloon ñoxor-njaayalkaati yi jàpp ko. Waaye dañu daan nég ba yëf yi dal ñu bàyyi ko. Ndekete booba ñu ngi xaar ba jekku ko, tam ko dëmm, nëbb ko jant bi. 

Léegi ma nga Rëbës, mu ngi fay bëgg a yàgg te du yoon tey, du yoon ëllëg. 

Bu doon sax liñ koy tuumaal moo ko wax ci gémmiñam, yoon mayul kenn mu jàpp ko.

Xéy-na li mu tudd Frãs moo tax ñu tëj ko. Réew nag, su demee ba ku wax sa xalaat ñu tëj la, kenn dootul xam lu mbir miy niru. Looloo tax ñu baree ngi naan Gii Maryiis Saaña daa war a génn kaso. Loolu la Raddho, Amnesty ak ñeneen wax. 

Moonte ay weer a ngi ñuy jiiñ càcc Aliyu Sàll, rakku Njiitu-réew mi, ñu naan dafa jalgati alalu Senegaal, ànd ceek saay-say bu ñuy wax Franck Timis. Waaye àttekat bi deful lu-dul woolu-woolu ko – ci yar ak teggin ! – ba noppi bàyyi ko mu dellu këram. Booba sax fekk na mu demoon Frãs ba delsi. Lu mu fa wuti woon ? Waa FRAPP/France dégage seen xel ñaaw na ci lool.

Doomu-Senegaal bii di Gii Maryiis Saaña deful dara lu-dul ànd ak AAR LI NU BOKK di jéem a aar li nu bokk. Waaw, xanaa li magam doonul Njiitu-réew mee tax caabi féete ko ginnaaw ca Rëbës ? Kon lii mooy ci dëgg-dëgg li Wolof naan : Kumba am ndey ak Kumba amul ndey…

Waaye kat, lii ëpp naa seetaan ndaxte tey Gii Maryiis Saaña, ëllëg keneen.

LEAVE A REPLY

Please enter your comment!
Please enter your name here