WÀÑÑITEG PAYOORUG LEKKOOL BI

Yeneen i xët

Aji bind ji

Ginnaaw ndaje mu tembere mi ñu amaloon ngir jël ay matuwaay ci yokkuteg dund bi, Càmm gi biral na dogal yees ci jël ci gaawu bii weesu. Màki Sàll mi jiite woon ndaje ma, jël na lu tollu ci fukki ndogal ak benn, yu ci ëpp jëm ci wàllu dund bi. Waaye, mbind mi ag payoor gi ci lekkool yi desuñ ginnaaaw.  

Lii day nirook wokkatu bu daje ak geestu. Ndax ci tijjiteg lekkool bii wees, way-jur yu bari fésaloon nañu seen i ñaxtu jëm ci njëg lu jéggi dayo ñeel mbindum ndongo yi. Ci loolu, njiitu réew mi jël na ci ay ndogal ngir wàññi njëg li. Muy ay dogal yu daj njàng mi yépp. Muy mu suufe mi, laal mu digg-dóomu mi ba ci njàng mu kawe mi. Bu ñu sukkandikoo ci ay kàddoom, njàng mu suufe mi (élémentaire, préscolaire) amatul fay, bu dee lekkooli Nguur gi.  bu  dee  njàng mu digg-dóomu mi (moyenne, lycée) mbind mi ñi ngi ko tënk ci diggante 6i téeméer ak 5 000 (junni). Bu fekkee ni njàng mi wuuteeg lekkooli Nguur gi, maanaam njàngum pay mi (école privé), njiitu réew mi wàññi na ci téeméer boo jël, ci njëgu bindu bi, fukk (10%). Li soxal njàng mu kawe mi, juróom jàpp fukk (5% à 10%) lees wàññi ci njëgu bindu bi. 

Waaye nag, du ñépp a bég ci wàññi gi. Ndax, lekkooli piriwe yi, seen i nafa dinañ ci woyof,  te daf leen a nar a jural ay gàllankoor. Loolu la kurél gi ëmb lekkooli piriwe yi di jooytu (fédération de l’education et de la formation). Ñooñu, cig yëgle, ñangay dànkaafu Nguur gi. Muy lu soxal ñàkk a càmbar seen i koom ak i jafe-jafe laata ñuy jël ay dogal. Ndax, li ñu gis mooy bu loolu àntoo, du ñu mën a fay seen i jàngalekat. Te, dinañ njort ne seen lekkool yooyu ci tëj la jëm. 

Mu mel ni, li ñu naan jàmmi waay, ayu waay mooy bëgg a am ci diggante boobu. Ndax wànniteg payoor gi jëm ci lekkool bi, lu way-jur yi ne siiw la. Waaye, dina jur ay jafe-jafe ci ñi yor lekkool piriwe yi.

Plus de publications

Widewo

Xët yi mujj