LI GËN A FÉS CI XIBAARI BÉS BI (22/01/2024)

Yeneen i xët

Aji bind ji

WOTEY 2024 YI

Usmaan Sonko

Usmaan Sonko dañ gàntal dabantal bi mu dugaloon. Ndaje mi teg ko ci 6i weer yi ñu gàlloon ci kowam ci digganteem ak Maam Mbay Ñaŋ. Waaye terewul, farandoowam bii di Basiiru Jomaay Fay dina bokk donte ni mi ngi ci kaso bi jamono jii. Ci kaso boobu mu nekk sax moo yitteel layookatam yi. Looloo tax ba ñu dugal ab dabantal, di ci sàkku bàyyib négandiku. Bees sukkandikoo ci Meetar Sire Keledoor Li mi leen jiite, seen yitte mooy Basiiru mën a dagaan baati askan wi niki lawax yépp mënee def.

Mbiri Kariim Wàdd

Ñaar-fukki lawax la ndajem ndeyu àtte réew mi dogal ni ñooy joŋante wotey féewiryee 2024 yi ngir wuutu Maki Sàll ci boppu réew mi. Keroog ci gaawu gi, bi 22i waxtu di waaj a jot la ndaje mi génne limka gi. Karim Maysa Wàdd bu PDS kepp la seppi ci 21i way-sàkku lawax yi mu bàyyi woon ñu jàll ci caytu gu njëkk gi.

Ginnaaw bi ñu ko génnee ci mbir yi, karim Wàdd yékkati nay kàddu ca saa sa. Li mu jàpp nag mooy ni dañ ko xañ yelleefam niki maxejj. Fas yéenewul itam bàyyi mu jàll nde dina dabantal fa ëttu àttakaay bu CEDEAO. Démb ci dibéer ji tamit, dépite yi fare PDS (Parti Démocratique Sénégalais) génne nañ cib yégle. Ñuy xamle ni dinañ taxawal ndiisoog gëstu fa ngombalaan ga ngir gëstu ci anam yees neenalee lawax yi, rawatinu bu Karim Wàdd.

Lawax yi ñu geg

Lawax yi ñu seppi woon ca njëlbeen ga ñu ngi wéyal seen xeex ni ñu ko waxee woon. Doon nañ sax jàkkaarlook taskati xibaar yi démb ci dibéer ji. Biral nañ ni duñ toog di xoole. Dinañu takku xeex ndax liy xew ci réew mi dëppoowul wenn yoon ak réewum yoon. Gis nañ ni sax gàcce dëgg la Senegaal di dund jamono yii ci kanamu nawleem yi. Ba tax na dinañu xeex seen kéem kàttan ngir wote yi am ci anam yu leer nañ.

SËFAAN (KAMIYOŊ) BI DAANU KEDDUGU

Fa keddugu, benn sëfaanu-mbànd buy sol gaasuwaal moo fa daanu. Mbir maa ngi am démb ci dibéer ji, bi 12i waxtu di jot. Sëfaan (kamiyoŋ) bi, réewum Mali la jëmoon, waaye bi muy tollook bokk-moomeelu Tomboronkoto la saaraan. Bi mu daanoo nag, dafa tàkk. Mu mel ni ñu ci nekkon, kenn muccu ca. Nde, bi wallukat yi ñëwee, ñaari nit lañ fa gis te fekk nañ ñu lakk ba desey yax kese. Bees sukkandikoo ci xibaar yi njëkk a rot, daw lu bare moo waral jéyya ji. Waaye, birigàdd bu sàndarmëri Mako ubbi na cib lànket.

TÀGGAT-YARAM

Ëllëg ci talaata ji la Senegaal di amal ñetteelu joŋanteem ci CAN biy am jamono jii fa réewum Koddiwaar. Mu ciy laaleek ekibu Gine bi nekk ci ñaareelu toogu bi. Joŋante boobu nag narul a yomb. Mënees na wax ni sax gañ-jël la ndax ekibu Gine bi dafa bëgg jot ci toogu bu njëkk bi Senegaal nekk ngir gën a jekku kayu kaardëfinaal yi.

Plus de publications

Widewo

Xët yi mujj