Sunuy naataangoy L’Observateur ñoo xëyee xibaar bi ci seen xët mu njëkk. Peeñug Njiitu réew ma woon, Sëñ Maki Sàll, la yéenekaay bi jiital, bind ne mi ngi waajal ngir jàmmaarlook ak Nguur gii koy tuumal ci mbirum bor bi ñu wax ne, daf ko nëbboon.
Sëñ Maki Sàll dafa bëgg a ragg boppam, teggi tuuma yees gàll ci ndoddam. Nde, ginnaaw bi leen askan wi dénkee lengey réew mi, Nguurug Jomaay ak Sonko gi dafa càmbaroon gafakag réew mi. Bi ñu noppee ci lëñbët boobee ñu doon lëñbët koppari réew mi, dañu gisoon ni Nguurug Maki Sàll ga woon dafa nëbboon lu bari ci borub réew mi. Te sax, ëttub cettantal bi génne woon na ag caabal guy feddali lu ni mel. Loolu doyul, FMI tamit dëggalaat bor boobu ñuy wax ne dañu koo nëbboon askan wi, nëbb ko FMI ak kuréli àddina yi Senegaal di liggéeyal. Bees sukkandikoo ci kàdduy njiiti réew mi nag, ku jiin Njaag a, te Maki Sàll mooy Njaag.
Maki Sàll nag, mi ngi wéy di weddi tuuma jooju. Fu mu dem, saa bu ci ñu ko laajee, dafay faxas tuuma yi, di wax ne menn réew mënul nëbb boram. Waaye, bees sukkandikoo ci waa L’Observateur, Maki Sàll fasul yéene yam foofu. Ndax, ci li ñu fésal, dafa jël ay layookat yu bari yoy, ci réew yu bari lañu cosaanoo. Dees na ci fekk i layookat yu fekk baax ci réew mi ak itam ay doxandéem, rawatina Saa-Farãs jii di Meetar Piyeer-Oliwiye Sur. Kookii, layookat la bu xelam màcc ci wàllu koppar.
Naka noonu, démb ci talaata ji, layookatam yi bind nañu ay bataaxal jagleel ko lenn ciy campeefi réew mi. Ba tay, ci kàdduy L’Observateur, jëwriñu Ngurd mi ak Nafag réew mi (Seex Dibaa), jot na ci. Waayeet, Njiitu Ëttu cettantal li (Mamadu Fay) jot na ci benn.
Ci saabalukaayu Yuusu Nduur bi xamle, Maki Sàll a ngi laaj, ci baataxal bi mu yónnee Njiitu Ëttu cettantal li, ndax IGF mi doon càmbar gafakag réew mi sàmmonte na ak sàrt yi ko tënk.
Ñu baree ngi laaj nag lu tax Maki Sàll di waajal xeex bob, dooragul. Amaana, moom Maki Sàll, dafa xam lees xamul. Te, tubaab nee na, ku bëgg jàmm, dangay waajal xare bi. Ndax pexe moomu la Maki Sàll di doxal jamono jii ? Li ci kanam rawul i bët.
