Soo déggee baatu « mousso », sam xel mën naa dem cib « restaurant » bu siiw ba ca Kanadaa. Waaye, « mousso » bii moom bokkul ak booba ; xéy-na waa Koddiwaar yi tudde jigéen « mousso » la gën a jege. Ndax, fii ci Senegaal, ci làkku màndinka, « mousso », jigéen lay tekki. Moo waral ay jigéeni taskati xibaar, jàngalekat, ak ñeneen ak ñeneen taxawal dalu web duppe ko mousso.sn ngir jigéen « génn cig lëndëm ». Àllarba jii, yemook 26eelu nowàmbar 2025, lees ko doon gaaral askan wi, muy yéenekaay ci lënd gi.
Soxna yooyu àndandoo ci liggéey bi dañoo gis ne aw askan, su bëggee jëm kanam fàww mu bàyyi xel ay jigéenam, cëral leen. Jox jigéen gëddaam nag du rekk jox ko àqam, waaye mooy naatal àddina.
Naka-jekk, jigéen ñi, dañ leen iy jëfandikoo te duñ wone nataal bi gën a jekk ci ñoom. Kon, mënees na ne Mousso.sn ñëw na ci waxtoom ngir jox jigéen kàddu mu waxal boppam : li ñeel dundinam, ay jafe-jafeem, néew dooleem, waaye it ci ay jéegoom ci lu baax. Nde, kenn umpalewul ne jigéen ñi dañoo xareñ lool te mu mel ni dafa am « ñu leen bëgg a nëq ci lëndëm gi »… Mousso taxaw temm ngir jigéen génn cig lëndëm, leeram jolli, wër àddina ndax « Jigéen ca kanam, àddina sépp ca kanam». Di ñaanal Mousso.sn ngelaw lu nangu.
