Xibaar

LI GËN A FÉS CI XIBAARI BÉS BI (30/8/2024)

By Ami Mbeng
0
19

Yeneen i xët

Aji bind ji

Ami Mbeng
Ami Mbeng

JËWRIÑU BIIR-RÉEW MI AMAL NAY TABB YU YEES

Jëwriñu Biir-Réew mi, Seneraal Sã-Batist Tin amal nay coppite yu bari ci kàngaami pólis yu mag yi. Nde, dafa wàccee ay nit, tabb ñeneen ñu leen di wuutu fa ñu nekkoon. Coppite yooyii, ci banqaas yii toftalu lañ leen amal : SU (Sûreté Urbaine), DIC (Division des Investigations Criminelles), « Division de Cybersécurié » ak ci yenn komisariyaa yu mag yi. Nee ñu, coppite yooyu jëwriñ ji indi, li mu ko duggee mooy ñoŋal caytug kaaraange gi askan wi. Nde, jamono jii, rey gi bari na lool ba jéggi dayo. Daanaka, doo xéy bés te déggoo ku ñu reyul walla ku ñu gaañul. Waaye, am na ci tabb yoo xam ne, jàppees na ni ay daan la.

Am na ay tabb yu bari nag. Waaye, yii toftalu lees gën a ràññe :

  • Aysatu Njaay, nekkoon Komiseer bu mag bu Cees, tabb nañ ko Tof-Njiit lu topp ci Njiitul Kaaraange bokkeef gi ;

  • Mustafaa Juuf, nekkoon Komiseer bu mag bu Ndar, tabb nañ ko Tof-Njiit lu topp ci Njiitul Pólisu Yoon ;

  • Elaas Bayti Seen, lañu tabb Njiitul DIC, Adaraame Saar la fa wuutu ;

  • Paap Mamadu Jijaag Fay lañu tabb Njiitul « Division Cybersécurité » ;

  • Mamadu Tendeng, lañu tabb Komiseeru Pólis Sàntaraal bu Ndakaaru. Elaas Séex Daraame la fa wuutu.

CAPS/TAXAWU SENEGAAL DËGGAL NA XIBAAR BI

Barki-démb, ci àllarba ji, la xibaar bi rot. Lu tollu ci ñaar-fukki kilifa ak juróomi kàngaam (cadres) ñoo xamle ne jóge nañ ci làng googu di Taxawu Senegaal. Li ñu layalee mba googu jubluwaay bi seen làng gi jël jamono jii. Nde, dañoo nemmeeku ne seen taxawaay bu bees bi mooy gën a rataxal seen diggante ak ñii di waa BBY (Bennoo Bokk Yaakaar) nga xam ne, xeex nañu leen lu tollu ci fukki at ak ñaar. Bi xibaar bi rotee, ci la ñii di waa CAPS/Taxawu Senegaal (Cadres d’Analyses Prospectives et Stratégiques) génn dëggal mbir mi. Te, nee nañu, ñi ngi naqarlu li gaa ñooñu génn làng gi. Naka noonu, ñi ngi sant ñi nga xam ne ñi ngi des ci làng gi. Ñoom waa  CAPS/Taxawu Senegaal ñi ngi yeesalaat seen ug bokk ci lang googu.

SENELEC INDI NA AY LEERAL

Këru liggéey gii di Senelec indi na ay leeral ci deewu kii di M. F. Kooku, kuuraŋ moo ko rey fa Tuubaa, ca koñ bii di Saam Sëriñ Baara Xuréja. Xew-xew baa ngi am ci altine jii weesu. Ñii di waa Senelec xamle nañu ne waa jooju liggéeyalu leen woon. Maanaam, ñoom yónniwuñu ko woon. Looloo tax, ñuy sàkku ci askan wi ñu ànd ak ug dal te gëddaal sàrti kaaraange yi ñu teg. Maanaam, lu ci mel ni bañ a def ay liggéey ci kuuraŋ te ñoom joxuñu la ndigal, añs.

XEW-XEW BU TIIS FA GIA

Jamono jii mel na ni bóomaate gi dafa taqarnaase fi réew mi. Ñuy wax ci bóom ga amoon fa Pikin Technopole noppeeguñu, leneen coow ñëwoon taxaw sunu kanam. Wii yoon, xew-xew bu tiis baa nga ame fa GIA, digganteem ak Podoor tollu ci juróom-ñaari kilomeetar. Bees sukkandikoo ci waa Seneweb, benn xale bu góor bu tollu ci ñaar-fukki at moo jam ab xaritam, mu dee ca saa sa. Li sabab bóom gi mooy ab xuloo bu doxoon seen diggante. Ki ñu ne moo def jëf ju ñaaw jooju nag, waa sàndarmëri teg nañu ko loxo.

BENEEN XEW-XEW BU DOY-WAAR FA TESKERE

Xew-xew bii ma nga ame fa Lingeer, ci dëkk bii di Daaru Salaam Belel Baawaan, bokk ci goxu Teskere. Nee ñu, jenn waay juy wuyoo ci turu M. Sow, tollu ci fanweeri at ak ñeent, lañu fekk mu xaru ci genn garab. Li ci gën a doy-waar mooy, ci lees wax, waa jooju, dibéer jii weesu la leen réeroon. Démb, ay boori juróom-benni waxtu ci ngoon lañu koy sog a gis fekk boobu génn na àdduna ba tàmbalee soppeeku bu baax. Moo tax, ci wetu fa mbir mi ame rekk lañu ko mujjee jébbal boroomam.

Ami Mbeng
Plus de publications

Widewo

Xët yi mujj

Defu Waxu mooy seen yéenekaay

Bindu

Bindul soo bëgee jot ci xibaar yi

© Newspaper WordPress Theme by TagDiv