Gëstukat yi ñu dénkoon mbirum Caaroy ak sóobare ya ñu fa bóomoon ca atum 1944 jébbal nañu Njiitu réew mi Téere bu weex bob, ci lañu dëxëñ njuréef yi tukkee ci seen luññutu gi ñi doon amal ñeel mbirum Caaroy 44, ñu duppe ko ci nasaraan « Livre blanc”.
Démb, ci àjjuma ji, kurél gi ñu dénkoon mbiri màggalug bésub Caaroy 44 doon na amal ab lël ginnaaw bi mu jébbalee Njiitu réew mi, Sëñ Basiiru Jomaay Jaxaar Fay, téreb njureefi gëstu bi aju ci mbirum Caaroy 44.
Wenn fan ci weeru desàmbar, ca atum 1944, la jëyya ji xewoon fa dalu sóobare yu nekkoon fa Caaroy. Ay sóobare, di ay Saa-Afrig, la seen i nawle yu réewum Farãs bóom, ginnaaw bi ñu leen xaarloowee lu yàgg ngir jox leen seen i peyoor.
81i at ginnaaw bi mu xewee, mbir maa ngi réewum Farãs doon nës-nësal ba askan wi ak njabooti ña ca loru mënuñoo jot ci dëgg gépp. Loolu la kurél gi ñu dénk lu jëm ci màggal xew-xew boobu dellu dëggal démb ci àjjuma ji.
Bees sukkandikoo ci kàddu yi Roqaya Faal mi jiite kurél gi fésal, bat ay, réewum Farãs daf leen nëbb yenn ciy wayndare yi war a leeral xew-xew boobule. Nde, ba léegi, bari na yu ñu mënul a teg bët, rawatina mbind yi fi sóobare yi bàyyi laata ñu leen doon faagaagal. Looloo tax ba ñu njort ni am na lu ñuy wéy di leen ko nëbb.
Gëstukat yi nag, taxaw nañu ngir ñu ubbiwaat wayndare yi ëmb mboor moomule ngir ñu mën koo melal niki jëyya ji ñuy duppe “crime contre l’humanité”. Gëstu yi ñuy amal ak sulli yi ñuy def fa barab ba dina leen dimbali ba ñu mën a natt seen lim ci lu wóor.
