Ginnaaw coowal sóobare yi toog fa boppu réewum Gine Bisaawu, geneen foqatig Nguur naroon naa amaat, wile yoon, fa réewum Benee ak ay sóobare yu nammoon a daaneel Njiitu réew ma, Patiris Talõ.
Tay ci dibéer ji, 7 desàmbar 2025, ag gàngooru sóobare doon nañu jéem a daaneel Nguurug Patiris Tolõ mi jiite réewum Benee. Ci suba si, ci ay waxtu yu teel sax, lañu teg loxo tele dëkk ba, daldi biral ni daaneel nañu Njiitu réew ma Patiris Talõ.
Bees sukkandikoo ci kàddu yi ñu biral, ni Njiitu réew ma di doxalee moo leen doyul. Naka noonu, ñu daldi biral ni aj nañu Ndayu Sàrti réew ma, boole ca tëjaale digi réew mépp ak seen jaww ja. Ginnaaw loolu, dellu nañu samp ag ndiisoog sóobare ca boppu réew ma ngir tabaxaat dëkk ba ci yeneen dalin.
Ay waxtu yu néew ginnaw bi sóobare yi biralee ni foqati nañu Nguur gi, jewriñ ji ñu dénk kaaraange biir réew ma, Alasaan Seybu, génn na wax ci turu Càmm gi. Ci kàddu yi mu yékkati, daldi nay dëggal cong mi sóobare yooyu amal ngir daaneel Nguur gi ak Campéefi Bokkeef gi.
Waaye, bees sukkandikoo ci leeral yi mu andi, seen mébét àntuwul. Nde Làrme Bokkeef gi jóg na ca saa sa ngir jàmmaarlook ñoom ci nii mu ko xamlee :
« Sóobarey Larmeb Benee ak seen i njiit, sàmmonte nañu ak seen giiñ, dellu des ci doon ay ngem-ji-Bokkeef. Seen taxawaay tax na ñu nasaxal pexey ñi doon jéem a këf Nguur gi, te ñoo ngi wéy di doxal ni mu ware. »
Naka noonu, jëwriñ ji di xamle ni Nguur gee ngi ci loxoy Càmm gi ñuy saytu bu baax te Njiitu réew maa ngi ci kaaraange gu wóor. Ba tax na ñuy sàkku ci askan wi mu ànd ak dal te wéy di dox ay soxlaam. Bees sukkandikoo ci xibaar yu sunuy naataango yu BBC fésal, Jëwriñ ja ñu dénk mbiri bitim-réew xamle naat ni ñu ëpp ci saytukati kaaraange Bokkeef gi ñoo ngi wéy di déggal Njiitu réew ma, Patiris Talõ.
Ginnaaw bi mbir mi biree, kurélug CEDEAO yékkati nay kàddu ngir ñaawlu lu ni mel te woroo ak Ndayu sàrti réew maak bëgg-bëggi askanu Benee. Kurél gi taxaw ci di sàkku ñu sàmmonteek Ndayu sàrti réew ma. Rafetlu naat taxawaay bi ci Càmm geek làrme bi am. Muy féddali taxawaayam ci wetu Càmm gaak askan wa.
Ma ngay dànkaafu itam way-fippu ya. Di leen xamal ni lépp lu ciy loraange ñoom la te kurélug CEDEAO bañu ci ba jàmmaarlook ñoom ciy ngànnaay ngir aar Ndayu sàrti réew maak réew mépp.
