XAATIMUG DÉGGOOB DAL DIGGANTE NGUUR GI, SÀNDIKAA YI AK “PATRONATS” YI
Bésub alxamesu tay jii lañu jagleel liggéeykat yi. Waaye, loolu terewul Nguur gi di ci amal i ndaje. Nde, tay la doon amalum ndaje mook sàndikaa yi ak way-njaatige yi ngir ñu xaatim ab déggoo. Ndaje moomu, ñi ngi ko doon amalee ci njiiteefu elimaanu jëwriñ yi, Usmaan Sonko. Li nekkoon jubluwaay bi mooy xaatim déggoo buy tax ñu mën a liggéey cig dal. Nde, lu dul jàmm rekk, jàmm a ko gën. Li ñu bëgg mooy gën a yombal waxtaan ak jëflante seen diggante. Su ko defee, ànd bi yemb, koom gi suqaliku, réew mi gën a naat. Te, loolu yépp cig dal ak teeyu bakkan la ko sàndikaa yeek Nguur gi mën a defe, du ci xiiroo ak ŋaayoo.
XIBAAR BU ÑEEL JËLUG 2.000i JÀNGALEKAT YI
Ci njeexitalu weeru sãwiyee wi la Nguur gi defoon ab woote. Li mu ci xamle woon mooy ne dafa soxla lu tollu ci 2.000i jàngalekat. Lu tollu ci 164.772i lawax bindu woon ci. Bi ñu xoolee mbooleem wayndare yi am na ñu matlewul walla fekk lijaasa yi ñu dugal méngoowul ak yi ñu leen laaj. Yi ñu ci gis ne ñoo sàmmonte ak li ñuy wër ñi ngi tollu ci 2.026i wayndare, ñu jël 2.000 yi, ne 26 yi nañu xaar. 2.000 yooyu ñu jël, 1.726 yi ci daara yu suufe yi (élémentaire/prescolaire) lañu jëm, 274 yi ñu yóbbu leen ci daara yu digg-dóomu yi (moyen/secondaire). Waaye, yamuñu foofu. Ndax, xamle nañu ne ñooñu ñu jël jot nañu bataaxal bi leen di xamal ban IEF walla IA lañu war a dem ak kañ lañu war a tàmbalee jàngale.
“COUD” INDI NAY LEERAL CI GÉNNUG ÀDDINA NDONGO LI
Ndongo lu daan jànge jànguneb UCAD lañu fekk ci néegam mu faatu. COUD (Centre des Œuvres Universitaires de Dakar) nag, génnee na ab yégle, tay, ci alxames ji, ngir indiy leeral ci faatug ndongo lu jigéen loolu. Moom, mi ngi wuyoo ci turu Sajala Mbaalo. Li waral leeral yi mooy dafa am saabalukaay yu siiwal ne fa biir néegam lañu ko fekk mu faatu, fa jàngune ba. Waa COUD di xamle ne loolu amul. Naam, ndongo la ca daara ja. Waaye, fa dëkkuwaayam la génne àddina. Te, moom ma nga dëkke woon fa Wakaam. Ci gàttal, moom faatoowul ci biir daara ju kowe jooju. Waa COUD, ñi ngi sàkku ci bépp saabalukaay bu tasaare woon xibaar boobu mu soppi ko ca na mu gën a gaawe.
TABB NAÑU BUUBAKAR KAMARA
Buubakar Kamara, kenn la ci ñiy yëngu ci wàllu pólitig. Moom nag, kenn dootu ko aajar. Nde, ba ci wote yii mujj moom ak waa Pastef ñoo bokkoon genn lëkkatoo. Moom nag, Nguur gu bees gi takkal na ko ag ndombog-tànk démb ci ndajem jëwriñ yi. Léegi, mooy jëwriñ fara-caytu bu mag bob Nguur gi. Ki mu wuutu ci béréb boobu di Ahmadu Al Amiinu Lóo ndax, moom it dafa am geneen ndombog-tànk.
NDOGUM YOON FA CAP-SKIRING
Ndog yaa ngi wéy ba tay ci tali yi. Daanaka, mënatuñoo toog diir bu ñu déggul am ndog. Nde, am na ndog mu am ci yoonu Cap-Skiring wi. Donte ne sax, du ay daamar ñoo mbëkkante, benn minibiis moo fa daanu. Juróom-ñaari doomi-aadama jële nañu ci ay gaañu-gaañu. Mu am ci ñaar ñoo xam ne fi mu tollu nii sonn nañu lool.
