MAKI SÀLL WAX NA…

Yeneen i xët

Aji bind ji

… CI LI MU FAR BORI JUUTI YI KIBAARAAN YI AMEELOON RÉEW MI

Njiitu réew mi, Maki Sàll, dafa jël ndogalu far lépp lu woon bor ciy juuti yu kibaaraan yi ameeloon réew mi. Keroog altine la jël ndogal li.  APS a siiwal xibaar bi, jële ko ci waa CDEPS (Conseil des Diffuseurs et Editeurs de Presse du Sénégal). Bor boobii, xaymees na ko ci 40i milyaar ci sunuy koppar.

Maki Sàll dafa dalaloon way-bokk CDEPS yi.Bees sukkandikoo ci genn kilifa kurélug njaatige yi (patronat), mu teewoon ca ndaje ma, ca biir waxtaan wa la leen ko Maki Sàll yëgal.

Mu xamleet ne, léegi, weer wu dee, tele yeek rajo war nañ fay  kurél gii di TDS (Télédiffusion du Sénégal) koppar yu tollu ci xaaju milyoŋ (500 000 FCFA).  Nde, bu njëkk, 1 milyoŋ lañ daan fay.

Ndogal li Maki Sàll jël nag, am ñu mu teey seen i xel. Boo demee ci X (Twitter ma woon), dees na fekk hashtag bii di « Deal avec la presse ou amnistie fiscale ciblée ? ». Kii Biraayim Sekk, njiitul Forum Civil, moo ko bind.

Laaj na sax Njiitu réew mi lan moo wund ndogal loolu mu jël. Dafa bind ne :

« Yow, Njiitu réew mi, Maki Sàll, war nga indiy leeral ci kibaaraan yi nga nar a baal seen i bori juuti te nga wax yan xeeti juuti la ñeel. »

Bees sukkandikoo ci kàdduy sëñ bi Sekk, jaaduwul ñuy naaxsaayal li ñuy coppati ci toppatoog liggéeykat yi.

… CI MBIRUM PASI SOROJ YEEK GIL GI

Keroog  awril 2024, Njiitu réew mi, Maki Sàll, dina génn pale, jébbal lenge yees ko dànkoon Njiitu réew lu bees li nar a falu bésub 24 màrs 2024. Jamono jii, kàmpaañ bi xumb na lool. Lawax yaa ngiy wër réew mi di xumbal, di biral seen i sémb ak a digaate. Kii di Basiiru Jomaay Jaxaar Fay bokk na ci ñi gën a fës. Moom, lawaxu lëkkatoo « Diomaye Président » biral na naal bim fas yéen jëmmal bees ko falee. Nee na, bu boobaa, dina waxaalewaat pasi soroj beek yu gil gil (contrats pétroliers et gaziers) yi Nguurug Maki Sàll gi xaatim ak i doxandéem. Nde, dafa jàpp ne, Senegaal baaxlewu ci, dañ nu cee jekku. Doomu Ndengleer ji yemul foofu rekk. Nde, nee na, dinaa xoolaat, saytuwaat diggante Senegaal ak Farãs. Rax-ci-dolli, bëgg na génn ci xaalisu CFA bi.

Maki Sàll nag, loolu jural na ko njàqare. Moom, Njiitu réew mi war a dem, àndul ci naal boobu. Bëggul ñuy soppi pas yi mu xaatim ba noppi. Ci laaj-tontu bim séqoon ak Bloomberg, Senego siiwal ko, la biral njàqareem, wax en bu loolu amee dina yàq lu baree bari ci koom-koomu réew mi. Daf ne :

« Saa su nekk, mënees na defaraat, joyyanti pasi soroj yeek yu gil gi. waaye, bu dee wax dëgg rekk, mëneesul a soppi pas yi nu xaatim ak àntarpirii yi ba noppi. »

Bu dee CFA bi, Maki Sàll dafa gis ne bu ci Senegaal génnee dina ko jural ay jafe-jafe yu jéggi dayo. Moo tax, ciy waxam, fal Aamadu Ba moo gën a wóor fal Jomaay. Moom, Maki Sàll, jàpp na ne, bu ñu ko falee Jomaay, dinañ dugal Senegaal ci guuta gu réy a réy.

Ci xalaatu Njiitu réew mi, dañu war a teg sunuy bët ci yokkuteg koom-koom gi, xëy mi, mbay mi ak tabaxte yi. Nee na, « jot nañoo def lu bari » te dañ war a sàmm kóolute nit ñi fiy dugal seen xaalis (les investisseurs).

… CI BÉSU DEMAM : « BÉSUB 2 AWRIL DAMAY DEM… »

Maki Sàll baamu na kàddoom gi : « damay dem. » Ci laaj-tontu bim doon def ak waa BBC, démb ci àllarba ji, 20 màrs. Jamono jii, lawax yaa ngi kàmpaañ bi di waajal wotey 24 màrs yi. Waaye, mën na am, bu bés baa, kenn bañ a falu, maanaam ñaarelu sumb (deuxième tour) am. Bu loolu amee nag, diir bi na xat lool. Maki Sàll nee :

« Bésub 24 màrs, bu amee ku falu, mën na am ma jébbal ko lenge yi. Waaye de, bu dee kenn faluwul keroog bés ba, man, damay dem bésub 2 awril. Ci la sama àpp di jeex te, benn bés sax fasu ma ko yéene toogaat ci boppu réew mi. Noonu laa ko waxee woon. »

Bu dee faluñu Njiitu réew lu bees keroog 24 màrs, bu Maki Sàll demee, Ndajem Ndeyu Sàrti Réew mi dina tabb njiitul Ngombalaan gi moo toogandi ci boppu réew mi fileek ñuy fal ku bees. Ndax, Maki Sàll dafa ne, wote ak ñàkk wote la ci yemale. Moom daal day dem, du toog.

Plus de publications

Widewo

Xët yi mujj