Càmm gi dellusi na ci way-am-bag yi (les nouveaux bacheliers) ak jël gi ñu leen war a def ci jàngune yi. Muy lu ñu bëgg a amal ci anam yu méngook bëgg-bëggi ndongo yi ak yéeney féexal jànguneb Ndakaaru.
Barki-démb ci alxames ji, ilimaanu jëwriñ yi àddu na ci way-am-bag yu bees yi ak jël gi ñu leen war a jël ci jàngune yi. Muy i kàddu yu mu yékkati ci bi ñuy amal ndajem jëwriñi yi. Ginnaaw bi jëwriñu njàng mu kowe mi àppalee ndongo yi diir bi ñu leen tijjil ngir ñu bindu ci daluwaay bii di Campusen (7 ba 27i pani weeru ut 2024), moom ilimaanu jëwriñ yi, dafa dawal xalaatam ci anam yees leen war a jëlee.
Naka noonu, muy fésal ngëneel yi aju ci yóbbu ndongo yi fa ñu namm a dem. Bees ko déggee nag, war nañu dëppale bëgg-bëggi ndongo yi ak jël gi. Maanaam, ndongo yi ñuy jël ngir séddale leen ci jàngune yi, ñu fexe ba ndongo lu nekk, fees koy dugal méngook tànneefam.
Pexe moomu nag, illimaanu jëwriñ yee ngi ko namm ngir sàmmonteek fànn wa ñu bëgg a topp ci seen njàng, walla fa ñu gën a mënee. Ngir loolu mën a nekk itam, fàww ñu waajal yeneen jàngune yu nekk ci diiwaan yi, gën leen a dooleel, joyyanti jumtukaay yeek dëkkuwaay yi. Bu ko defee, dinañu mën a jël ñi fa soxlaa dem ñépp. Te, loolu dina féexal itam jàngune bu Ndakaaru ak limam bu jéggi dayo.
Jëwriñ ji bëgg naat ñu taxawal tëralin wu yees ngir lépp leer, ba ci anam yees di séddalee ndongo yi seen i payoor. Waaye, du yam rekk ci payoor yi. Nde, ba ci dëkkuwaay yi, warees na xoolaat nees di joxee néeg yi ñuy jox ndongo yi.
