LÀMB JI
Dibéer 16i fani féewiryee mooy bés bi njabootug lamb yépp di xaar. Ndax, ca bés booba la ñaari waada yu mag war a daje, ñuy Aama Balde, doomu Pikin ji, ak Farã, doomu Pàrsel ji. Muy bés bu réy, ñaari mbër yu mag war cee sëgg. Njortees na ci bëre bu neex. Waaye, yamul foofu, ndax ca bés ba, Liis Njaago dana ca daje ak Lac Rose, Doomu Daagu / Caatu Yoof, Nàndi Faal / Ñaŋ Baalo, Ndigal / Bildoseer, Sox bu ndaw ak Mbay Fay
KUPPE
-
Saaliw Siis amaat na këlëb
Saaliw Siis bokkoon na ci waaday CAN 2022 bi. Moom nag, at mooma la gëjoon a am këlëb. Waaye, léegi, daldi nay amaat këlëb bu bees ca Farãs. Xaatim na fa Entente Feignies Aulnoy Fc, di këlëb bu nekk ca National 2 ba. Mu sori lool dayo ak fa mu tolloon ci futbal, waaye wolof nee “ku amul ndey, nàmp maam ! “
-
Ligue des champions
Ay daje dina am ci ayu-bés biñ jëm ñeel ekib yi war a leeral seen ug jàll. Maanaam ekib yi dem “barrage”. Gannaaw puluf, nii la mats yiy tëdde :
Atalanta / Fc Brugge
Dortmund / Sporting
Real Madrid / Man City
Bayern Munich / Celtic
PSV Eindhoven / Juventus
AC Milan / Feyenoord
Paris SG / Brest
Benfica / Monaco
-
Coupe du roi
Àllarba 12i fani féewiryee lees di amal jiifii-jaafaawu dëmi-finaali po ma. Ñeenti ekib yii ci desandi, ku nekk mën ci dajeek sa moroom, ñooy : Real Madrid, Atletico Madrid, Real Sociedad ak Barcelone.
-
Ligue 1 : Usmaan Démbalee ngi dox ci ndox.
Saa-Farãs bi, jamono jii, ciy loxoom la Paris Saint-Germain nekk. Moo fa taxaw taxawaayu Mbappe, boot ekib ba tey doxal. Fim ne, mu ngeek 16i bii ca sàmpiyonaa ba, waaye it 21i bii buñ boolee matsam yépp. Mu bokk, nii, ci atakã yi gën a tàng ci futbal bi. Bile taxawaay nag, ñu ci bari nee nañ daf ko yéex a def, nde ku ko seetaan xam ni mën na lu ko raw.
-
Marcelo bàyyi na futbal
