Càmm gi jël na ndogalu dakkal saabalukaay yi sàmmontewul ak Yoon. Muy ndogal lu mu jël ginnaaw ay weer bi mu tëralee sàrt yu yees yees war a sàmmonteel ngir liggéey ci wàll wile.
Keroog talaata, 22i fan ci weeru awril 2025, la jëwriñ ji ñu dénk jokkoo gi, xaralay jokkoo gi ak nimerig bi, Àlliyun Sàll, xaatim ab « arrêté » jëme ci yoonal gi ñu sumboon ñeel saabalukaay yi. Ca biir « arrêté » booba nag, moo nga cay digal saabalukaay yi dëppoowul ak sàrt yees yoonal, ñu dakkal seen i yëngu-yëngu.
« War na ci saabalukaay yi sàmmontewul ak sàrtu saabalukaay yi ñu dakkal lépp lu ñu doon jàllale walla di ko tasaare ciy xibaar ak ya ñuy jëfandikoo, te doxal matuwaayi sàrti saabalukaay yi. » (Jëwriñ Àlliyun Sàll)
Naka noonu, muy fàttali ni këru yéenekaay yi ci lënd gi, yuy bind yi ak tele yeeg rajo yi, dañu war a sàmmonteek sàrt biy tëral ak a doxal yëngu-yëngu yi jëm ci saabalukaay yi.
Ci weeru féewiryee wee weesu (6i fani féewiryee 2025) la njëwriñ gi mu jiite biraloon toftaleg 258i saabalukaay yoy, Càmm gi nangul na leen seen am, ndax sàmmonte nañu ak tëralin yi war.
Ñuy xibaar yoy, Sëñ Habiibu Ja mi yore jokkoo gi fa biir njëwriñ ga indi woon na ciy leeral. Ci li mu jotoon a fésal, 639i saabalukaay ñoo jébbale woon seen i wayndare ci daluwaay bii di « Déclaration médias du Sénégal », te Nguur gi amaloon ko ngir ñu bindu ci.
381i saabalukaay yoy, jotuñu woon a matale jumtukaay yi sàrtu saabalukaay yi nangu ngir mën a yëngatu ci wàlli wi, la « arrêté » bi di diir tay. Mu leen di xamal ni képp kuy jàllale ay xibaar yu dëppoo walla yu dëppoowul ak li am, war na ci moom mu sàmmonte ak jumtuwaay yu sàrtu àtte bi. Képp ku lànk nag, bañ a jëfe ndogal li, am na ay daan yu lay xaar.
DST (Division de la Surveillance du Territoire), di bànqaas biy saytu biir réew mi jot na ndogal itam, keroog ci talaata ji. Mu jóge ci kilifa yi, di leen jox sañ-sañub aaye saabalukaay yi sàmmontewul ak sàrt yi Nguur gi tëral. Démb rekk ci àjjuma ji, 25i fan ci weeru awril wi, woolu woon nañu fa saabalukaay yu bari ngir wax leen ñu dakkal ci saa si seen liggéey.
Donte ni jubluwaayu ndogal lu ni mel mooy jubbanti wàllu saabalukaay yi, bari na ay way-yëngu ci wàll wi yoy, tiital na leen, walla mu teey seen xel ba ñu jàpp ni dafa nar a nasaxal péexte gi saabalukaay yi baaxoo.
