Dexu Senegaal gi nar naa walaat fa Maatam ak Bàkkel bu taw bi wéyee di fa sotti ci ñaari fan yii ñu jublu. Xibaar la bu kurél gi yor wàllu ndox mi biral ginnaaw ndox mu bari mu fa taw ci fan yii.
Démb ci àjjuma ji, waa DGPRE (Direction de la gestion et de la Planification des ressources en eau), di kurél giy topp wàllu ndox mi, génn na ab yëgle ginnaaw ndox mu bari mi wàcc fi réew mi, ci fan yii. Ca yëgle boobu nag, ñoo nga cay artu ci tolluwaay bi ndox mi àgg ci dexu Senegaal gi, rawatina fa tollook Maatam, Bàkkel, Kidiraa, Podoor ak Ndar-Géej.
Bees sukkandikoo ci seen yëgle bi, fileek ñaari fan, bu wéyee di taw, ndox ma dina àgg fu teey xel te raglu lool.
Bu dee fa Bàkkel, natt ba ñuy ragal ndox ma àgg fa moo ngi ci 10i meetar. Te, démb ci àjjuma ji ndox ma jot naa yéeg ba ci 8,25i meetar. Ñu gis ne koon 1,75i meetar kepp a tere ndox mi yegg fa ñu koy ragalal. Naka noonoot la ndox mi yéegee fa Maatam ba daanaka 1,57i meetar kepp a des mu tollu fa ñuy ragal mu yegg fa. Nde fii mu tollu, bariwaay ba yéeg na ba àgg ci 6,43i meetar. Te, bu àggee ci 8i meetar dina mën a andi ay loraange.
Bu weesoo Bàkkel ak Maatam, tolluwaayu ndox mi ci dexu Senegaal gi tiital na itam askan wi nekk fa Kidiraa ak Podoor, donte ni dese na 3i meetar ba ci 5i meetar ngir mu àgg fi mu mënee lore. Fa Ndar-Géej moom 0,83i meetar kepp tee ndox ma yegg fa mu mënee lore.
