GÀTTALI BÉS BI (4/7/2023)

ÑAKK A BOKK MAKI SALL CI WOTEY 2024 YI : ÀDDINA SAA NGIY RAFETLU NDOGALU NITU NGUUR KU KO MATE

Maki Sàll dafa jël ndogalu bañ a doon lawax ci wotey 2024 yi ngir, ciy waxi boppam, sàmm kaaraange réew mi. Ñu baree rafeltu ndogal loolu, ci biir réew mi ak ci bitim-réew.

• Antoñoo Guteres, Magum Fara-caytu Mbootaayu xeet yi, tagg na Maki Sàll

Ci Twitter la Magum Fara-caytu Mbootaayu xeet yi, Antoñoo Guteres, biral naweelam ci Njiitu réew mi, Maki Sàll. Dafa bind, wax ne :

« Dama bëgg a biral naweel gu réy gu ma am ci Njiitu réewum Senegaal, Maki Sàll ak meloy nitu Nguur yi mu wone. Ndogal li mu jël def na ko royukaay bu mag fa réewam ak ci àddina sépp. »

• Musaa Faki Mahamat, Njiitul Ndajem Bennoog Afrig, naw na Maki Sàll

Musaa Faki Mahamat, Njiitul Ndajem Bennoog Afrig dafa bind, ne :

« Maa ngi fésal sama naweel ci nitu Nguur ku mag ki mu doon, ginnaam bi mu jiitalee Senegaal ak li mu sàmm demokaraasi Senegaal bob, sagu Afrig la. »

• Àmbasaad Etaasini a ngi rafetlu ndogal li Maki Sàll jël

Àmbasaadu Etaasini ci Senegaal tamit rafetlu na ko tamit, ñaax yeneen Njiiti réewi Afrig sowu jant ngir ñu roy ci Maki Sàll. Dañu bind ne :

« Etaasini a ngi rafetlu yégle bi Njiitu réewum Senegaal, Maki Sàll, def, xamle ne du dagaan ñetteelu moome. Kàdduy Maki Sàll yi ay royukaay lañu ci diiwaan [Afrig sowu jant] bi, mu safaanook ñiy jéem a nasaxal sàrti demokaraasi yi, ak yemaleg moome yi. »

Àmbasaad bi biral na sag bi muy am ci jàppale campeefi wote yi ak way-moome yu Senegaal yi ci liggéey bu am solo bi ñuy amal. Rax-ci-dolli, saa-amerig yi dige nañ ne, dinañu wéy di gunge Senegaal ngir dëgëral yéeney askanu Senegaal ci saxal dàkk demokaraasi fi réew mi.

YEWWI ASKAN WI A NGI ARTU MAKI SÀLL ÑEEL USMAAN SONKO

Waa lëkkatoo Yewwi Askan Wi doon nañ janook taskati xibaar yi tey ci ngoon gi. Ginnaaw bi kilifa yu bari waxee, Abiib Si mi jiite ndajem njiiti lëkkatoo gi moo tëj kàddu gi. Moom nag, mi ngi artu Maki Sàll ak waa àddina siy gaawantu di ndokkale Maki Sàll ci ndogal li mu jël, bañ a nekk lawax ci wotey 2024 yi. Bees sukkandikoo ciy kàddoom, du ndogal loolu kese mooy tax jàmm am, lépp a ngi aju ci mbirum Usmaan Sonko. Moo ko tax a wax ne :

« Démb ba tey, maa ngi dégg ay nit ak yeneen i kilifa ñuy fésal seen mbégte. Waaye, maa ngi leen di moytuloo, fàww nu def ndànk. Jàmmu Senegaal dëgg-dëgg mi ngi aju ci mbirum Usmaan Sonko. Tere ko nekk lawax ak tëkku ay tamndareti ndawi Senegaal ak Afrig ñoo yem. Te, kenn mënul téye ndaw ñi. »

Abiib Si teg ci ne, Maki Sàll fexe na ba Kariim Wàdd ak Xalifa Sàll mën a bokk. Kon, na fexe tamit ba Usmaan Sonko mën a bokk, ndax, ciy waxam ba tey, ci la jàmmu Senegaal aju. Góor gi Abiib Si fàttaleet na ne, Yewwi Askan Wi mësul a bañ a bokk ci waxtaan wi Maki Sàll woote. Waaye, nee na, Maki Sàll dafa war a wone dëggoom, jëf jëf yoo xam ne dañuy wone ni bëgg na waxtaan dëggantaan. Mu ne daf ko war doore ci génne kaso téeméeri téeméeri ndaw yi mu jàpp te dindi ndar-kepp gi mu ndar-kepp kërug Usmaan Sonko.

IDIRIISA SEKK : « NA USMAAN SONKO MUÑ BA WOTE YIY ÑËWAAT, XALE LA. »

 Idiriisa Sekk àddu na ci ndogalu Njiitu réew mi. Wax na tam ci mbirum Usmaan Sonko. Waaye de, li mu digal njiitul Pastef li du lu koy neex, rawatina ay àndandoom yi ko def seen lawax ci wotey 2024 yii ñu dëgmal.

Idiriisa Sekk séq na waxtaan ak 7TV ak Seneweb. Wote yii di ñëw, daf cee seppi Usmaan Sonko ngir ne, Yoon a ko daan.

« Dañu war a doxal àttey Yoon ba mu mat. Ca mboolaay goo dem, noonu la fay doxee. Sama mébét mooy lawax yépp mën a bokk ci wotey. Waaye, bu dee Usmaan Sonko, dama ne, bu Yoon dalee ci kowam, na muñ ba wote yiy ñëwaat, xale la. »

Moom, njiitul Rewmi, dafa jàpp, ak lees werante werante ci àttey Yoon, dañ leen a war a doxal. Moo ko tax a waxati ne :

« Ay junniy junni saa-senegaal ñoo ngi ci kaso yi jamono jii, ndax dañ leen daan (…) Bés bu Yàlla sàkk, ñu werante ci àttey Yoon ci réew yu mag yu mel ni Farãs, Etaasini, waaye dañ leen di doxal. »

Paap Aali Jàllo

Plus de publications

• Paap Aali Jàllo

  https://www.defuwaxu.com/author/paapaalijallo10/

  NDAJEM NDEYU SÀRTU RÉEW MI DËGGAL NA LAWAXUG SONKO AK BÀRTELEMI JAAS
• Paap Aali Jàllo

  https://www.defuwaxu.com/author/paapaalijallo10/

  WOTEY NGOMBLAAN YEES RANDALSI : DGE SIIWAL NA 41 TOFTALE
• Paap Aali Jàllo

  https://www.defuwaxu.com/author/paapaalijallo10/

  MAKI SÀLL, LU LA KO JARAL ?
• Paap Aali Jàllo

  https://www.defuwaxu.com/author/paapaalijallo10/

  FMI RAFETLU NA DOXALINU CÀMMUG SENEGAAL GI