Xeex bi àddina sépp doon ragal ci diggante Irã ak Israayel tàmbali na. Ginnaaw bi Israayel njëkkee sànni ay bomb ba Irã fayu, sànnante yaa ngay wéy? donte ni biralaguñu seen ug sóobu cib xare.
Ci guddig alxames, jàpp àjjuma, la Israayel amal am cong jëme ci réewum Irã. Muy cong mom, bees sukkandikoo ci xibaar yi Càmmug Israayel njëkk a fésal, béréb ya ñu duppe sites nucléaires ak ay dali sóobare lañu diir, door fa ay misil. Naka noonu, jot nañu dal ci lu ëpp 200i ca béréb yooyule.
Ginnaaw bi Israayel amalee cong mi nag, jur na ay yàq ca saa sa, donte ne réewum Irã fésal na ni yàqu-yàqu yi amuñu solo noonu. Waaye 6 ci kilifa yu mag yu làrme ba ak Njiiti Révolution ba ñàkk nañu ci seen i bakkan.
Ginnaaw bi Israayel songee nag, magum jëwriñ yu réewum Israayel fésal na ni cong mi mën naa yàgg bu ñu gisee ni jar na ko. Waaye, réewum Irã toogul rekk di xaar. Nde, ca saa sa lañu dakkal naawug roppalaan yi ak seen dal fa dalu roppalaan bu Imaam Xomeyni. Naka noonu, mu tàmbalee fayu ci ngoonug àjjuma ji ak ay misil yu mu teglee sànni Israayel, rawatina ca péey yu mag ya.
Ba ci gaawu gi, ñaari réew yee ngi wéy di sànnante ay misil. Fa Teherã, waññeegum nañu fa 78i doom-aadama yu ci ñàkk seen i bakkan, gën-gaa tuut, ak 329 yu ci jële ay gaañu-gaañu. Naka noonu it, ñetti nit faatu nañu ci fa Israayel, ñu bari jële ciy gaañu-gaañu. Nemmeeku nañu fa itam ay yàqu-yàqu yu bari.
Jamono ji cong mi di am itam, fekk na réewum Irã ak Amerig nekkoon ciy waxtaan ñeel naal wi aju ci mbirum nucléaire. Ëllëg ci dibéer ji sax, waroon nañu wéyal waxtaan yi. Waaye, réewum Irã xamle na ni jaratul ñuy wéyal yooyule waxtaan. Nde, Israayel dafa leen woo ci xare. Njiiti Révolution baat giiñ nañu itam ni dinañu fayul seen Njiit li ñu faat.
