Amet Ndóoy, kenn la ci koronikëeri Sentv yi. Moom nag, dañu koo téyandi fa “Brigade de Recherche bu Faidherbe”. Moom nag, du guléet muy am coow ak Yoon bi fi Nguur gu yees gi toogee ak tay. Li ñu koy toppe ci téyandig tay jii mooy tooñ walla ŋàññi nit ku am lépp walla lenn ci dayoy Njiitu réew mi ak biral xibaar yu wérul.
Saabalkat bii di Maymuna Nduur Fay moom mujj nañu koo bàyyi. Nde, kenn umpalewul ne moom dañ koo jàppoon ci ndoorteelu ayu-bés bii. Li ko waraloon mooy jotaay bi mu doon séq ak kii di Majambal Jaañ ba sax ñu mujjoon a dog waxtaan wa. Dafa di, moom Majambal, jamono jii, dañu koo def li ñuy wax “mandat d’arrêt international”.
Naka noonu, saabalkat bii di Baabakar Faal, nekk fa Rfm, moom, mujjoon nañu ko bàyyi démb. Maanaam, moom lañu njëkk a bàyyi sax laata ñuy bàyyi Maymuna Nduur Fay donte ne sax, ñoom ñaar ñépp mbirum Majambal Jaañ moo taxoon ñu téye leen.
Mu amaat tamit beneen daan bu dal ci kaw Majambal Jaañ. Coow li ñeeloon mbirum Sulaymaan Telikoo, ëttu àtte bu kawe bi leeral na ko. Dëggal na daan bi ñu ko tegoon. Maanaam, daan nañu ko ñetti weeri kaso yu mu war a tëdd. Rax-ci-dolli, mu war koo dàmp lu tollu ci juróomi miliyoŋ.
DÀQ NAÑU NDONGO LII DI COON JAW
Mbetteel gu réy la ndongo yiy jànge fa daara ju digg-dóomu jii di “Lycée Jules Sagna”. Li ko waral du lenn lu mooy ndogal la kilifay béréb ba jël. Nde, dañoo dàq kii di Coon Jaw nga xam ne moo nekkoon Njiitu Nguurug daara ja, ñu koy wax ci farãse “gouvernement scolaire”. Bees sukkanikoo ci waa Seneweb, li sabab dàq gi mooy yaradiku ak ñàkk a jox cër campeef ga. Nee ñu nag, loolu mi ngi sosoo ci kàddu yi mu yékkati woon ginnaaw bi mu amee ay këyiti kàtte yu génnoon laata seen waxtu. Ay mbokkam, ñoom, jàpp nañu ne ndogal ba jaarul yoon. Ndax, daara ji dafa war a jàppale ndongo yi. Waaye, waruleen a dàq.
XEW-XEW BU TIIS FA UCAD
Naqar ak tiis la ndongo ya nekk fa daara ju kawe joj Ndakaaru yeewoo tay. Am ndog mu doy waar moo fa am ci subag tay jii. Bees sukkandikoo ci xibaar yi jot a rotagum, benn “moto électrique” moo tàkk fa béréb bii ñu naan Pavillon A. Mu am ndongo lu ci ñàkk bakkanam. Mi ngi wuyoo ci turu El Haaj Muhammed Ñaŋ. Mi ngi nekkoon ci ñetteelu atu njàngam ngir am lijaasa bii ñu naan “Licence”, ci banqaasu gëstu “Arabe”. Waaye, jéyya ja yamul foofu. Nax, am na tamit ñaar ñoo xam ne jële nañu ci ay gaañu-gaañu.
SOXNA SUSAAN JÓOB GÉNN NA ÀDDINA
Tay, ci alxames ji, la soxna sii di Susaan Jóob wuyuji Boroomam. Amoon na lu tollu ci téeméeri at ak benn. Moom nag, kenn dootu ko aajar ci réew mi. Dafa di, moom mooy jigéen ju fi njëkk a nekk ndawu Yoon, maanaam, “magistrate”. Te, bi mu koy nekk mi ngi amoon lu tollu ci fanweeri at ak juróom-ñett. Mu amal liggéey bu am solo ci wàll woowu mu féete woon.
