Jëwriñu njàngale mi ci daara yu ndaw yeek yu digg-dóomu yee ngi ci tànki jële fi njoogaani jànguwaay yi. Démb ci altine ji, séqi na ab jéego ci sémbuw PURAP (Programme d’Urgence de Résorption des Abris Provisoires), daldi xaatim ab déggoo ak waa DIRGEN (Direction du Génie et de l’Infrastructure des Armées). Naka noonu, DIRGEN noppi na ngir ànd ak jëwriñ ji, boole ko ak seen xarañ ak seen pasteef, ngir tabax ay kalaas ci biir réew mi, waaye itam ngir gunge ko ci toppatoo bi ginnaaw tabax yi.
Mbirum Këpp Kees mi Fa NJËWRIÑU NJÀNG MU KAWE MI
Ndey Yaasin Géey mi fi nekkoon DAGE (Directeur des Affaires Générales et de l’Équipement) fa njëwriñu njàng mu kawe mi, moo ngi ba tay ci guddi yu bët-setagul. Keroog ci àjjuma ji lañu leen (moom ak i ñoñam) jébbaloon waa PJF (Pool Judiciaire Financier) ginnaaw bi ñu leen jiiñee njuuj-njaaj ak luubal xaalisu askan wi. Delloowaat nañu leen fa komisariyaa. Tay ci talaata ji lañu teew fa “parquet financier” ba. Waaye, nangu nañoo delloo xaalis bu tollu ni koppar yees leen di tuumaal ngir woyofal daan bi.
NGOMBLAAN GI
Ginnaaw-ëllëg ci alxames ji, 8 me 2025, dépite yi dinañu dajewaat fa Ngomblaan ga. Bees sukkandikoo ci woote bi Njiitu Ngomblaan gi woote, moom Allaaji Maalig Njaay, ñoo ngi leen fay xaar bu 10i waxtu jotee ci yooro-yoor bi ngir ñu càmbar sémb wow, ñu fi nekkoon ay jëwriñ ci Nguuru Maki Sàll lay diir. Muy sémb wuy dellu ci càmbar ak a leeral jëme ci yees leen dénkoon, ñu gën koo miis ci “rédition des comptes”.
Jàppati nañu ay doomi Aadama yu bëggoon a dugg ci gaal yi, wutali tugal. Takk-der yu komisariyaa bu Luga ñoo leen teg loxo niki démb ci altine ji. Fekk ñu doon amal ab coytu, àndoon ceek waa BR (Brigade de Recherche) ak waa GMI (Groupement Mobile d’Intervention) ginnaaw xibaar yi ñu ci corfati woon. Cib oto Njaga Njaay lañu leen fekk, ñu fobu ba nar a wutali tefes ga. Ñoo ngi tolloon ci 46i nit, 33 yi di ay saa-senegaal, 6 yi diy doomi Gàmbi, 4 yi diy saa-gine ak yeneen 3i doomi Siyeraa Lewon. Luññutu yaa nga ñuy wéyal ngir teg loxo ña sumb yoon wa ak ña leen naroon a jàllale.
NDOGU YOON MI AMAT CI TALI BI
Ginnaaw Ndog mu metti mi amoon fa Welingara, ci gaawu bi, meneen ndog amaat na ci tali bi, naka démb ci altine ji. Ag daamar gu jóge woon ca Daaka ba moo daanu bi muy waaj a dugg Bàkkel. Ñetti nit daldi ca ñàkke seen i bakkan ca saa sa. Ginnaaw gi la leen wallukat yi xettalisi, daldi rawale way-loru ya. Bees sukkandikoo ci xibaar yi gën a fés, benn pëno daamar gaa toj, mbir ya ëpp doole sófóor ba, oto ba mujje daanu.
