CÀMBAR YI JÓGE CI SÉMBI TEG I TUUMA ÑI FI NEKKOON I JËWRIÑ
Ngomblaan ga yëngu na lool fan yii. Ndax, bu ñu jógee ci lii rekk, dal ca lee. Ginnaaw bi ñu muree mbalaani kiiraayi ñaari dépite. Am na ay jëwriñ yu ñu yóbbu fa ëttu àttekaay bu mag bi ñuy dippe “Haute Cour de Justice”. Jëwriñ yii lañ fa yóbbu : Mansuur Fay, Aysatu Sófi Galaadimaa, Ismaayla Maajoor Faal, Mustafaa Jóob ak Salimata Jóob. Ku nekk ci ñoom, am na tuuma ju ñu teg ci ndoddam. Daanaka ñoom ñépp lu ñeel yorin wu bon ci “Fonds Force Covid-19” lañu leen di tuumaal ba mu des Ismaayla Maajoor Faal. Moom mi fi nekkoon jëwriñu Yoon, li ñu koy tuumaal mooy 250i miliyoŋ yu mu jaayoon doole benn “bailleur”. Maanaam, ab xeetu ger la daal bi ñu xoolee ni mbir mi tëdde. Mansuur Fay ñi ngi koy toppe koppar gu tollu ci 2,749i miliyaar ci lu ñeel yorinu “Fonds Force Covid-19”. Aysatu Sófi Galaadimaa, nekkoon fi jëwriñu soroj bi ak laf gi, 193,1i miliyoŋ lañu koy tuumaal. Kii di Mustafaa Jóob tamit nekkoon fi jëwriñu yokkuteg ndefar gi ak këru liggéeyukaay yu ndaw yi ak yu digg-dóomu yi, ñi ngi koy tuumaal 2,5i miliyaar yu mu yoree ci anam yu muccul ayib. Salimata Jóob, nekkoon fi jëwriñu jigéen ñi ak njaboot gi, moom 57i miliyoŋ lañu koy toppe.
TAXAWALUG PAVIE II
Tay, ci alxames ji, lañu doon taxawal naal wii di PAVIE II (Projet d’Appui et de Valorisation des Initiatives Entrepreneuriales) ci njiiteefu elimaanu jëwriñ yi, Usmaan Sonko. Mu nekkoon ndaje moo xam ne, moom Usmaan Sonko jot na fa a yékkati ay kàddu ngir dellusiwaat ci naal wi ñu namm a yoree réew mi. Waaye tamit, mu wax ci njariñal naal wii ñu doon taxawal ak ban taxawaay la ci ay ñoom BAD ak AFD (Agence Française de Développement) war a am. Nde, naal wii, njariñal ay junniy jigéen ak ay ndaw ngir ñu mënal seen bopp.
TÀBB NAÑU PAAB BU BEES
Ci weeru awril wii ñu génn la fi Paab Farãsuwaa jóge. Boobaak léegi, xamaguñu woon kan moo ko fay wuutu. Waaye, mujj nañu koo xam tay ci alxames ji. Ki ko wuutu, mi ngi wuyoo ci turu Cardinal Robert Francis Prevost. Moom nag, mi ngi jël turu Léon XIV. Kon, léegi, xamees na kiy doon kilifag katolig yi. Moom mooy ñaari-téeméer ak juróom-benn fukk ak juróom-ñaareelu Paab.
JENEEN TUUMA TEGU NA CI NDODDU FARBA NGOM
Ca jamono yee jàll lañu ko tegoon loxo, moom Farba Ngom. Ba nii ma nga ca kaso ba. Donte ne sax, ay miliyaar yu takku lañu ko doon toppe. Amaat na meneen mbir mu laxasuwaat ci li ñu ko doon toppe. Wii yoon lu ñeel mbirum suuf la. Ndax, nee ñu, am na ñaari téerméer ak juróom-fukki pàkk ak benn yoo xam ne moo leen moom. Mu am tamit lu tollu ci 29i “titres fonciers” yu nekk fa goxu Ngor-Almadies ak ay taax bees sukkandikoo ci waa Seneweb. Te, neeti nañu, yamul foofu. Ndax, am na yeneen bayaal yu luññutukat yi gis te, jàpp nañu ne moo leen moom. Rax-ci-dolli, yooyu sax nekkuñu ci biir réew mi. Am na yu nekk fa Burkinaa Faaso, Benee, Koddiwaar ak Tógoo. Waaye, xameesagul nu yëf yi mujje. Ndax, moo moom walla moomul.
XEW-XEW BU DOY WAAR FA NGOR
Tay, ci yoor-yooru alxames ji, la xew-xew bu doy waar am fa Ngor. Am taax mu gudd moo fa daanu. Taax muy tollu ci juróomi etaas. Mu doon xew-xew bu yéeme ci ñi ko jot a gis. Nde, ca jamono ja muy am dafa am ku ko jël ci jollasoom. Widewoo boobu lañu tasaare ci mbaali jokkoo yi. Fim tollu nii nag, ci xibaar yi jot a rotagum, xamle nañu ci am na kenn ku ñu ca génne, mu daldi mucc. Mu am ñaar ñu ñu ne dañoo des ca biir. Kenn xamul ci lan lañu nekk. Waaye, fii ak diir bu gàtt. Ndax, waa “sampeurs-pompiers”, fajkat yi, sàndarmëri, ñépp a nga ca liggéey ba ngir xettali képp ku fa mbir mi fekk.
BENEEN XEW-XEW FA “GRAND-YOFF”
Foofa ca “Grand Yoff”, benn ñawkat lañu fa jiiñ ne da doon sàkku ñaari xale yu jigéen yu tollu ci juróom-ñetti at. Bees sukkandikoo ci Senego, waa ji, ñeenti téeméer la leen jox. Li toj mbir mi mooy seen jàngalekat moo gis xaalis ci sikaarey ñaari xale yi. Bi mu leen laajee, ñu xamal ko ne ñawkat bii di wuyoo ci turu M. Jaag moo fa jaar. Bi ñu demee ci fajkat yi gis nañu ay firnde yuy dëggal tuuma jooju. Waaye, waa ji moom li mu nangu mooy ne jox na leen xaalis. Ciy waxam, siif moom defu leen ko. Moo def walla deful dees na ci xam dara balaa yàgg.
