MAKI SÀLL, NAY RAFET !

Yeneen i xët

Aji bind ji

Ci guuta gu réy la Senegaal génn, ginnaaw bees amalee wotey 24 màrs yi ba kii di Basiiru Jomaay Jaxaar Fay jël raw-gàddu gi. Xol yi féex, xel yi dal, ñépp sant. Lees doon ragal ciy fitna ak tafaar mujjul am ; wote yi am nañ ci jàmm ak salaam. Li tax nag mooy ne, ca njëlbeen ga, Maki Sàll dafa toxaloon wotey 25 féewiryee yi ci coobare boppam, dugal réew mi guuta, jaxase kàrt gi. Mu am ay ñaxtu ba ñaari bakkan rot ci. Noonu, àddina sépp singali ko, daldi koy ga  ngir amal wote yi. Ndajem Ndeyu Sàrti Réew mi neenal ndogal yi mu jëloon ngir ajandi wote yi, sant ko mu amal leen laata moomeem giy jeex, bésub 2 awril 2024.

Ca la Njiitu réew mi jàppee bésub 24 màrs 2024. Lawax yi daldi kàmpaañ ci jàmm, maxejj yi wote, Basiiru Jomaay Jaxaar Fay falu. Ci biir kàmpaañ bi la génnee Usmaan Sonko ak Basiiru Jomaay Fay ci kaso bi ginnaaw bim woteloo fa Ngombalaan ga àtteb amnisti. Réew mi daldi noyyiwaat. Loolu doyul, mu dalal Njiitu réew lu bees li, Basiiru Jomaay Fay, ak Usmaan Sonko fa Njénde la. Ñu wone leen ñuy nuyonte, di saafonte, di weccey kàddu ak a muuñ. Ñépp rafetlu ko ndax, ginnaaw ay, jàmm. Te, rafetal moo war ñépp. Waay de, ni Maki Sàll di doxalee fan yu mujj yii, kenn rafetluwu ko.

Lu yées 4i fan la Maki Sàll dese laata muy jébbal Nguur gi Basiiru Jomaay Fay mi askanuw Senegaal fal. Waaye, moom de, mi ngi wéy di jël i ndogal yoy, waratu ko. Dafa di, moom Maki Sàll, dafa tabb masistaraa bii di Abdulaay Njaayci boppu ci ëttu àttawaay bu mag bi. Muy ndogal lol, bare na lool ñu ko ci ŋàññ ginnaaw bi mu ko jëlee te ñaari fan kott dese ko ci boppu réew mi.

Abdulaay Njaay mi mu fa teg sax moo nekkoon njiitu pekku ëttu àttewaay bu kawe bi (président de chambre à la cour suprême). Mu daldi wuutu Sire Aali ba mi àlatereete. Ndogal loolu nag, Njiitu réew mee ngi ko jël démb ci àjjuma ji, bi ñuy amal seen ndaje mu mujju ñeel ndiisoog àttekat yu kowe yi (Conseil supérieur de la magistrature), te mu jiite ko.

Muy nag ndogal lu Saa-senegaal yu bare ŋàññ ba ci dépite bii di Guy Mariis Saañaa ak Àlliyun Tin, boroom Afrikajom Center. Ndaxte, li ka fi dese, bu baree ba bare, du weesu ñaari fan. Keroog 2i fan ci weeru awiril wii nu dëgmal la war a jeexal. Kii di Àlliyun Tin sax, dafa gis ni ndogal luy salfaañe sàrt yees gën a miis ci Nguur gees nangul ki ko war a wuutu la. Muy xalaat bu mu fésal ci X (nekkoon fi tweeter). Ba tax mu jàpp ni Maki Sàll dafa nekk di jeexal, kon warul a xuus ci Nguuru ki ko war a wuutu.

Dépite bii di Guy Maris Saañaa moom, yamul sax ci ñaawlu ko. Dafa cee yokk ni ndogal li dëppoowul ak Ndeyu Sàrti Réew mi. Ndax Njiitu réew lu bees li, Basiiru Jomaay Jaxaar Fay moo ko yayoo. Ba tax mu jàpp ni Maki Sàll deful lu dul di salfaañe ak a buruxlu di tabb ab xaritam ngir mu nekkal ko fi ëllëg.

Bu weesoo ëttu àttewaay bu kawe bi, Njiitu réew mi amal na yeneen tabb fa Ndajem Koom gi, Mboolaay mi ak Kéewnga gi, maanaam CESE (Conseil économique, social et environnemental). Joxe na fa 80i toogu, teg ca 40 yoy, ay way-bokk-bokkoo (membres associés) lañ. Am naat ñu mu wàcce.

Bokk na ci ñi mu tabb foofa, kii di Malal Taal, nu gën koo xam ci turu Fou Malade. Moom mile sax, xamle na ni yëgul, tinul, kenn diisoowu ceek moom. Dafa jékki saa rekk, ay ñoñam di ko woo ak di ko ndokkale ndax liñ ko gis ci yéenekaayu Nguur gi. Ba tax mu def koy ree.

Waaye, donte xamul lenn ci CESE, dina liggéeyal Nguur gi ci ñeenti fan yi fi dese campeef googu. Muy i kàddu yu mu yékkati ci anam yu reelu. Mu mel ni dafay xaar ci Njiitu réew mu bees mi mu far campeef googu, ni mu ko digee woon ci naalam, ak yeneen campeef yu deme ni HCCT (Haut conseil des collectivités territoriales) wala HCDS (Haut conseil du dialogue social). Loolu doyul, mu torlu ab dekkare, boole sàndarmëri ci làrme bi. Lu mu ci namm, aar leen ?

Bu loolu weesoo, Rasin Taala mi jiite RTS tamti yokkal na ñenn ci liggéeykat ya fa nekk seen payoor, ful leen ba ñu àgg 800 000 FCFA. Njiitul ASP yi tamit, mi ngi jël rekk. Ca yeneen i banqaasi Càmm gi, ñu ngi ruumandaat ne njiit yaa ngiy jëlaate rekk, di joxe ay pas yu amul àpp (Contrat à durée indéterminée). Mu doxalin wu ñaaw te jekkadi. Ñuy xaar ci Njiitu réew lu bees li, Basiiru Jomaay Fay, mo far ndogal yooyu yépp, joyyanti mbir yi. Ndax, lu loxo def, loxo mën na ko dindi.

Plus de publications

Widewo

Xët yi mujj