Tay, ci altine ji, lañu woolu woon dépite yi fa Ngomblaan ga. Li waraloon woote bi mooy xool nu ñuy taxawalee ndiisog cëtëŋ. Li ñu ko dugge mooy àddu ci càkkuteef li leen Yoon jébbal. Maanaam, Yoon dafa bëgg Ngomblaan gi muri mbalaani kiiraayi Mustafaa Jóob ak Ndey Sali Jóob Jeŋ ngir ñu mën koo wuyusi. Dafa di, ñaari dépite yooyu, dañu leen di tudd ci mbirum koppari mbasum Covid-19 mi.
Ayu-bés bii ñu génn la Ngomblaan gi xamle woon ne dina taxawal ag ndiiso ngir àddu ci càkkuteefu Yoon li. Tay lañu woo woon dépite yi ngir taxawal ndiisog cëtëŋ. Ndiiso googu nag, mujj nañu ko taxawal. Kippaangoy dépite yépp am nañu ku leen fa teewal donte ne sax mën naa nekk kenn. Ndax, bu dee limi dépite yi nekk ci kippaangoo yi tolloowul, ñi leen di teewal duñu mën a tolloo. Ndegam, Pastef moo ëppale ay dépite, kon mooy ëppale ñu koy teewal ci ndiiso googu.
Ndiiso gi, am na lu tollu ci fukki dépite ak benn. Juróom-ñeent ya Pastef lañu bokk, kenn ki bokk Takku Wallu Senegaal. Ka ca des moom mooy teewal ñi nga xam ne binduwuñu fenn. Ndiiso googu ñu taxawal mooy àddu ci li jëm ci li ñuy toppe seen ñaari naataango yooyu. Te, bees sukkandikoo ci xibaar yi Seneweb siiwal, ndiiso gi woolu na ñaari dépite yooyu. Àllarba jii di ñëw la leen jox dig-daje. Ndey Sali Jóob Jeŋ, ñi ngi woo bu ñetti waxtu ci bëccëg jotee. Mustafaa Jóob, moom, ci ngoon gi lañu ko woolu bu juróomi waxtu jotee. Su ko defee, ñu mën leen a déglu ci li ñu leen di tudd.
Mu mel ni, moom, Mustafaa Jóob, lii du guléet ñuy muri mbalaanu kiiraayam. Ndax, la ko jiitu, muri woon nañu ko ci mbirum Tabaski Ngom mi. Li jaaxal ñu bari kay, mooy lan moo tax ñuy muriwaat am mbalaanam. Bu dee jotoon nañoo muri mbalaanu kiiraayam, ñu amaat leneen lu ñu koy toppe, muri gu njëkk ga du tere, ñu muriwaat am mbalaanam. Te, wii yoon, li ñu koy toppe mooy mbirum koppari mbasum Covid-19.
Dafa di, bu dee taxawal nañu ndiiso gi ba noppi, léegi, ñu xam la cay topp. Bu ñu leen wooloo ba déglu leen ci mbir moomu. Ci lañuy xame ndax, dees na muri seen i mbalaan am déet. Li ci kanam rawul i bët.
