Coowi pólitig yi lëmbe na lool réewi Afrig sowu-jant yi, rawatina ci juróomi at yu mujj yii. Donte ne sax, la ko jiitu daan nañ fi nemmeeku ay xew-xewi pólitig yu doy-waar. At yii moom daf cee raw. Duñu jóg ci di dégg ay Nguur yu ñu daaneel, ay wote yu ñu tuxal walla sax ay làngi pólitig walla seen i njiit yu ñu bëgg a faagaagal. Te, coow lu deme noonu moo lëmbe jamono jii réewu Mali. Nde, Nguurug sóobare sa fa nekk, seen mébét mooy jële fa làngi pólitig yi. Nde, dañoo jàpp ne dalug réew mi ci la aju. Loolu la gaa ñi fare ci kujje gi ne mukk duñu ko dégg.
Atum 2020 ba tay, Mali jógewul ci coowi pólitig. Ndax, ca at mooma lañu daaneloon Nguur ga fa nekkoon. Booba ba tay nag, sóobare yi ñoo jiite réew ma. Donte ne sax, ñoom Seneraal Asimi Goytaa ñi fa nekk nii, atum 2021 lañu fa ñëw. Moom Asimi, moo nekk ca boppu réew ma booba ba tay. Amalul ay wote, deful dara. Waaye, yemul foofu. Ndax, ci weeru awril 2024, dafa dakkaloon ca réew ma lépp luy xew-xewu pólitig. Maaanaam, làng yi amuñu sañ-sañu amal i ndaje. Li ñu ko layalee woon mooy ne dafa am xeex bu ñu sumb ngir jàmmaarloo ak nooni réew mi. Te, ñu gis ne dal gi ci géewu pólitig gi dina leen ci jàppale. Waaye, ñi fare ca kujje ga moom gisewuñu mbir ma noonu.
Mu mel ni, dafa am beneen xew-xew bu ñëw yokk ci xar mi karaw. Dafa di, ci njeexitalu weeru awril wii ñu génn, Nguur gi dafa woote woon aw waxtaan. Ñi fare ci kujje gi moom lànk ne duñu fa teg seen tànk. Loolu terewul ndaje maa am. La rote ca ndaje ma kay moo yëngalaat géewu pólitig ga. Nde, dañu ne léegi Seneraal Asimi day am moome gu tollu ci juróomi at. Rax-ci-dolli, ñu mën koo falaat. Maanaam, mënees na koo yokkalaat geneen moome. Li merloo gaa ñi fare ca kujje geek ñenn ci kuréli way-moomeel yi mooy li ñu fa bëgg a jële làngi pólitig yi. Te, kenn umpalewul ne réew ma noonu la baree ay làng ak i mbootaay. Lu jege ñetti téeméeri làngi pólitig ñoo nga fa.
Ndogal boobu ñuy ruumandaat moo tax gaa ñi fippu. Keroog ci gaawu bi, lëkkatoog làngi pólitig yi ànd na ak mbooloo mu takku génn di ñaxtu. Te, li ñu ko dugge du lenn lu moy Nguur gi dellu ginnaaw ca yoon woowa mu jël. Naka noonu, ci dibéer ji, am na ñenn ñu bokk ci làngi pólitig ya ak kuréli way-moomeel ya ñu booloo woon daje ca béréb yii ñuy dippe “Palais de la culture” ak “Maison de la presse” ngir ñaawlu li Nguur gi namm a teg ci kaw kujje gi.
Li ñu bëgg mooy Nguuru sóobare yi jeex fanweeri fan ak benn ci weeru desàmbar atum 2025. Rax-ci-dolli, ñu joxe àpp gu leer ngir wote ni ko ndeyu-sàrt yi santaanee. Maanaam, ñu delloosi demokaraasi. Ndax, làng yu bari yi dafa baax ci demokaraasi réew. Li mat a laaj kay mooy ndax, ñaxtu yooya dina tax Nguurug Seneraal Asimi Goyta teggi tànkam fi mu ko teg ? Li ci kanam rawul i bët.
