SENEGAAL AK MÓRITANI : NDEFARUG GIL BI DINA TÀMBALI

Yeneen i xët

Aji bind ji

Dees na tàmbali ndefarug gil (gaas) gi ci diggante Senegaal ak Móritani. Ci atum 2023 mii nu génn la liggéey bi waroon a door. Waaye, mujjuñu ko sumb. Ci seen i wax nag, ren jii moom, liggéey bi dina tàmbali fileek 6i weer ci biir atum 2024 mii.

Gil gi walla gaas bi dina ball ci atum 2024 mii. Loolu la kilifay Senegaal yeek yoy Móritani xamle. Ci njeexitalu atum 2023 mii nu génn la Senegaal ak Móritani waroon a tàmbalee jaay gaas bi ñuy ballal fi béréb bi ñu duppee GTA (Grand Tortue Ahmeyim). Muy béréb bu nekk ci diggante ñaari réew yi, 120i km ci biir géej gi. Doon nañ ci séentu sax lu tollu ci 900i tamñaret (milyaar) ci diggante 2023 ak 2025. Waaye, ba sunu jonnu tey, jaayaguñ ci tus ndax yàggaayu liggéey bi.

Ci wàll woowu sax, jëwriñu soroj beek laf ju réewum Senegaal ak jëwriñ ji ñu dénk soroj bi, mbéll yeek laf gi fa réewum Móritani doon nañ amal i ndaje ci ñaari fan yii ñu weesu, 18 ak 19 sãwiyee 2024, fa Ndakaaru. Muy ay ndaje yu aju ci yi ñu daan faral di amal ak ndiisoog càmbar gu GTA (Commission consultatif du GTA). Li ñu ko duggee mooy nemmeeku ak a topp liggéeyu gaas bi.

Ginnaaw ndaje moomu nag, jëwriñ yi génne nañ ab yégle. Bees sukkandikoo ci seen yégle bi, ndaje yooyee dimbali na leen ba ñu mën a natt yéexaayu liggéey bi ak yokkute yi mu leen jural ciy deppãs. Naka noonoot, gaas bi dina tàmbalee génne fileek 6i weer ci atum 2024 bi.

Bu dee àpp yi ñu njëkkoon a siiwal, ndefarug gaas bi dina jural ñaari réew yi koom gu takku ci diirub 20i at yees ko war a ballal. Looloo waral ba ñi seen xel màcc ci mbiri soroj, gil ak laf def ay taxaw seetlu ñeel njariñ li mu mën a amal askan wi.

« Jëfandikoo gaas bi dina wàññi bu baax njëgu ‘kilowatt/h’. Te itam, askan wi dina ko yëg ci ni muy wàññee seeraayu laf gi bees ko gam-gamleek li ñuy fey jamono yii. » (Sëriñ Xaadim Kan, Senelec)

Muy ay kàddu yu mu biral ci lël bi ñu doon amal démb ci àjjuma ji (19 sãwiyee 2024), fa daara jii di École polytechnique de Thiès. Ñu doon fa waxtaane laf gi ak njeexital yi mu mën a am ëllëg ci koom gi, kéewnga geek kaaraangeg ñi koy jëfandikoo.  Bokk na ci liñ fa jàppeet ni bees bëggee gaas bi feeñ bu baax ci dundiinu askan wi, laaj na ñu farlu bu baax ci anam yi ñuy defee tàggatu yi ngir ñu gën a méngook li jamono ji laaj.

Plus de publications

Widewo

Xët yi mujj