Tay, altine juróom-benni fan ci weeru oktoobar atum 2025, lañu ubbi lekkool yi fii ci Senegaal. Mu doon bés bu am solo ci mbooleem ñiy yëngu ci njàng ak njàngale, rawatina jàngalekat yi. Ndax, ñoom jàngalekat yi ñoo ubbiji béréb yooyu ci bésub tay jii. Waaye, balaa yàgg ndongo yi dinañu leen fekksi ngir ñu mën a door njàngum at mu bees mi.
Ñetti weer ginnaaw bi lekkool yi tëjee ak léegi, tay, ci altine ji, jàngalekat yi delloo nañu buum ca mboy-mboy ga. Nde, ñoom, dem nañu ca lekkool ya ñuy jàngalee ngir ubbiji. Waaye, njàng ma ak njàngale ma moom, du mën a dooragum. Ndax, kenn umpalewul ne dafa am ñeneen ñoo xam ne dañoo bokk ci ñi ŋànk liggéey boobu. Te, bu ñu waxee njàng sax ñoo tax, muy ndongo yi. Ñoom, ndongo yi, dinañu tijji ci àllarba ji yemoo ak juróom-ñetti fan ci weer wii ñu nekk. Kon wure wa dem na kéŋ. Nooflaay jeex na.
Ayu-bés bii la atu njàngu 2025-2026 door. Maanaam, ci lañuy tàmbalee at mu bees mi. Waaye nag, bu ñu waxee ndoorteelu njàng mi, daara yu kawe yi taxul ñuy wax. Ndax, ñook daara yu ndaw yi, yu suufe yi ak yu digg-dóomu yi bokkuñu tëralin ak doxalin. Bañ nañu ko sax ba bokkuñu ay njëwriñ. Looloo tax, daara yooyu moom seen yoonu bopp lañuy jaar. Ñook yii bokkuñu waxtu yi ñuy tijji, bokkuñu tamit waxtu yi ñuy tëj.
Ubbiteg ren jii nag, waajal nañu ko bu baax. Ndax, ci àjjuma jii weesu rekk doon nañu amal am ndaje ñu koy dippe “conseil interministériel”. Ñi ngi ko doon amalee fa béréb bii di “Building administratif Président Mamadou Dia”. Jubluwaay bi moo nekkoon waajtaayu ubbite gi. Waajtaay boobu lenn waralu ko lu moy bëgg a njàng mi jaar yoon, gën a mucc ayib. Moo tax, ca ndaje mooma, elimaanu jëwriñ yi, Usmaan Sonko, jël na fa fanweeri ndogal ak ñaar.Te, duggewu ko lenn lu moy njàng mi gën a baax.
Kon, ci yoon, at mu bees mi moom door na tay. Ndax, tay lañu ubbi lekkool yi fii ci Senegaal ci mbooleem béréb yi nga xam ne matuwaay yépp daje. Maanaam, amuñu benn gàllankoor, lu deme ni ñàkk jàngalekat, mbënd walla yu ni deme. Li des kay mooy ñaan at mi doon at mu dal te ànd ak i njureef yu mucc ayib.
