Benn fan ci weeru me mooy bés bi ñu jagleel liggéeykat. Maanaam, ci lél boobile lees di màggal liggéeykat yi. At mu jot noonu lay deme. Moo tax, besub 1eelu me, kenn du ci liggéey. Mu doon bés bu ñu fonk lool.
Bees delloo ci mboor, dees na gis ne Amerig la bés bi sosoo ca atum 1886. Cosaan bi mooy, ca at mooma, dafa amoon i sàndikaa liggéeykat yu doon xeex ngir seen i àq. Liggéeykat yi dañu doon xeex ngir ñu wàññil leen waxtu yi ñuy liggéey, rawatina 8i waxtuy liggéey ci bés bi. Ginnaaw gi la leen yeneen liggéeykati àddina si feelu, xeex bi daldi daj fépp. Booba ba tay nag, at mu nekk, dañuy màggal bés bi, di ci fàttaliku xew-xew booba ngir gën a sàmm ak a aar àq ak yelleefi liggéeykat yi, fépp fu ñu mën di bokk, ak lu ñu mën di liggéey.
Naam, àddina sépp a koy màggal. Waaye, ca Amerig ga xew-xew bi amoon, weeru sàttumbar lañu koy màggal. Ñoom, saa-amerig yi, Labor day lañu tudde bés bi. Waaye, yeneen réew yi, niki Senegaal, 1eelu fanu me lañu koy màggal. Fii nag, fi Senegaal, Njiitu réew mi baaxoo na dalal liggéeykat yi ak way-njaatige (patronat) yi fa njénde la, waxtaan ak ñoom, déglu leen ngir saafara seen jafe-jafe. Naka noonu, Njiitu réew mi, Basiiru Jomaay Jaxaar Fay, dalal na leen tay jii, daldi baaxantal aada bokkeef gi. Ginnaaw gi, jot na li ñuy dippe “Les cahiers de doléances des centrales syndicales”.
Wëliis ndaje bi liggéeykat yi ak way-njaatige yiy daje ak Njiitu réew mi, am nay ay xew-xew ak i ndajey waxtaan yees di amal ci bés bile ñeel liggéeykat yi ak lépp lu aju ci seen liggéey, rawatina seen i àq yees war a sàmm.
