Ngomblaan gi muri na mbalaani kiiraayi ñaari dépite yii di Mustafaa Jóob ak Ndey Sali Jóob Jeŋ. Muy ndogal lu tukkee ci ndiisoog cëtëŋ gi, ginnaaw bi ñu jotee càkkuteefu jëwriñ ji ñu dénk wàlluw Yoon jëme ci coowal koppari mbasum Covid-19 bi.
Ginnaaw bi ko jëwriñ ji ñu dénk wàllu Yoon sàkkoo ci toppekat bu mag bi fa Ëttu dabantal bu Ndakaaru, Ngomblaan gi doon na àddu démb ci àjjuma ji, 2i fan ci weeru me 2025, ci lu aju ci mbiri dépite yii di Mustafaa Jóob ak Ndey Sali Jóob Jeŋ. Ñuy ñaari dépite yoy, bokkoon nañu ci Càmm gi, ca jamonoy El Haaji Maki Sàll mi fi nekkoon Njiitu Réew mi.
Cig pàttali, ñaari dépite yi dees leen a tudd ci caabalug Ëttu caytu gi ak luññutu yi mu jur ci wàlluw Yoon ñeel yorin wu teey xel wees njort ci junniy miliyaar yees jagleeloon xeexub mbas mi. Ca Jamono yooya, Mustafaa Jóob moo nekkoon ci boppu njëwriñu Ndefar gi, ndefar yu ndaw yi ak yu digg-dóomu yi. Bu dee Ndey Sali Jóob Jeŋ itam, moom moo jiite woon njëwriñu Njaboot gi, mbirum « genre » ak kaaraange xale yi.
Ginnaaw bi mu saytoo càkkuteefu jëwriñ ji, gis-gisub ndiisoog cëtëŋ gu Ngomblaan gi moo doonoon ñu muri seen mbalaani kiiraay. Naka noonu, 124i dépite jotoon nañoo teew bi ñuy féncal meeru Luga bi, dépite Mustafaa Jóob. Kenn ci ñoom bankul loxoom, nde ñoom ñépp àddu nañu ci. 116 yi ñoo àndoon ci ñu dindi mbalaanu kiiraayam, 8 yi ci des ànduñu ci woon. Ci noonu la Njiitu Ngomlaan gi biralee murig mbalaanu kiiraayu dépite bi.
Ni ñu doxalee ak Mustafaa Jóob lañu doxalee itam ak Ndey Sali Jóob Jeŋ. Nde, lu tollu ci 118i dépite wote nañu gis-gisub ndiisoo gi. 132i dépite ñoo teewe woon wote ba. Ñu gis ne kon 18i dépite kott ñoo ci àndul woon.
Ginnaaw bi Ngomblaan gi jàllalee ndogal yi tukkee ci ndiisoog cëtëŋ gi, dina yemb léegi ngir Yoon mën a topp ñaari dépite yi. Bees sukkandikoo ci jëf yees leen di tuumal nag, nar nañu leen a toppe lu jëm ci luubal alalu askan wi. Nde, nee nañu Mustafaa Jóob dafa teggi yoon, tabb ab saytukat ba noppi amalaat ay peyoor ci loxook loxo. Bu dee Ndey Sali Jóob Jeŋ itam, wax nañu ni moo joxe ay ndigal (ciy kàddu ak i mbind) ngir ñu amal ay peyoor yoy, dara jaaru ci yoon.
