Fan yii yépp, kanamu Maalig Jóob moo lëmbe mbaali jokkoo yi. Li ko waral mooy ne, ci lees saabal, sóobarey réewum Ikren yi ñoo ko jàpp. Nde, dañu wax ne dafa bokk ci merseneeri Afrig yiy xeexal Riisi. Moom nag, Maalig Jóob, li wér te wóor mooy ne, dafa jàngi woon foofa, fa réewum Riisi.
Ci li BBC fésal, xale bu góor bi Senegaal la cosaanoo, ci dëkk bu ñuy wax Kër-Mandumbe, ca diiwaanu Kafrin. Mu ngi tollu ci 25i at, daan jànge ca jànguneb Aliyun Jóob bu Bàmbey. Ca atum 2023 la amoon bursu ngir jàngi fa jànguneb Lobachevsky bu NizhnyNovgorod, fa réewum Riisi.
Ci àllarbay barki-démb ji lañu ko jàpp, yemook é »i fani awril 2025. Sóobarey Ikren yi ñoo siiwal xibaar bi ci ab widewoo bu 5i simili. Ci xëtu Facebooku 49eelu batayoŋu cong bees duppee « Sich des Carpates » lañu ko siiwal. Ci widewoo boobu, ñu ngi ciy tuumaal Maalig Jóob, di wax ne dafay xeexle Riisi ci xare bi dox digganteem ak Ikren.
Ci widewoo bi ñu ko wane, Maalig Jóob mi ngi sol yérey sóobare waa Riisi, soldaari Ikren yi di ko laaj. Ba tay ci widewoo bi, Maalig Jóob mi ngi ne xóll, mel ni ku tiit, jaaxle, jànnaxe. Ci làkkuw riisi la doon tontoo soldaari Ikren yi. Waaye, bi muy tontu, dafa doon nimse. Ci biir i tontoom, xamle na ne Senegaal la cosaanoo. Bees sukkandikoo ci soldaari Ikren yi, dafa bëggoon jóge Riisi, jàll Almaañ te amul xaalis bi muy demee. Loolu moo ko tax a ràngu ci làrmeb Riisi biy xare ak Ikren.
Moom nag, Maalig Jóob, bi ko fajkat yi saytoo, gis nañu ne dafa ame gaañu-gaañu ci tànk. Ca lañu ku taxawoo, faj ko, génnee ko ca toolu xare ba. Bi ko ay mbokkam yëgee, dañu tàllal loxo ñi jiite réew mi, di leen ñaan ñu def seen kemtalaayu kàttan ngir delloosi ko ci réew mi.
