MAKI SÀLL TABB NA CÀMM GU YEES

Yeneen i xët

Aji bind ji

Fanweeri jëwriñ ak juróom-ñeent la Njiitu réew mi tànn ngir ñu àggali liggéey bi fii ak wotey 2024 yi. Ci biir fanweer ak juróom-ñeenti jëwriñ yooyu, juróom-benn kese ñoo ciy jigéen. Ci ngoonug àllarbay démb ji, 11i fan ci oktoobar 2023, la Umar Ba Sàmb, magum tof-njiitu njiiteef gi, dawal dekkare bi tabb Càmm gu bees gi. Tele RTS a ko tegoon.

Àjjuma jii weesu la Njiitu réew mi, Maki Sàll, tasoon Càmm gog, 22 sàttumbaar 2022 la ko tabboon, tegoon Aamadu Ba ci bopp bi. Moom Aamadu Ba, moom la Maki Sàll jiitalaat ci boppu Càmm gu bees gi.

Bi mu jëlee kàddu gi ginnaaw Umar Ba Sàmb, jëwriñ ju mag ji dafa xamle ne :

“Càmm gu yees gii ñu taxawal, Càmmug liggéey ak xeex la gog, 39i jëwriñ a ko séq.”

Liggéey boobu ñu sumb ñeel juróom-benni weer yi des ci wotey njiiteefu réew mi, Aamadu Ba nee na, ci ñeent jubluwaay lañ ko tënk :

“Bi ci jiitu mooy fexe ba Senegaal gën a moom boppam, amal wotey 25 féewaryee 2024 yi ci anam bu mucc ayib. Ñaareel bi mooy song tembarey koom-koom geek dundub mboolaay gi, rawatina dooleel bees war a dooleel yokkute gi, fexe yokk dooley njëndu askan wi, xeex dund bu jafe bi, utal ndaw ñi xëy.”

Bu dee yeneen ñari jubluwaay yi, daf ne dañuy : “fexe ba caytuy bokkeef gi dox ni mu ware ak saxal jàmm ci fànn yépp. Àggali naal yi gën a jamp ci yi fi Njiitu réew mi sumb te door, ci ñetti weer yi mujj ci atum 2023 mi, naalu liggéey yi gën a solawu ñeel Plan Sénégal Emergent bi.”

Càmm gu yees gi nag, am nay coppite bees ko méngalee ak bi jàll. Nde, gu njëkk ga 38i jëwriñ la amoon, gii ñu samp démb nag 39i jëwriñ la am. Rax-ci-dolli, am na ñu toxu, am ñu génn, mu am it juróom-benni jëwriñ. Yu bees.

Cig pàttali, Yanqooba Jatara (tàggat-yaram) ak Aali Sale (càmm gi) dañu tekki woon seen i ndomboy-tànk (awril 2023) keroog bi Idiriisa Sekk, seen njiitul làngu pólitig (Rewmi [Réew mi]) biralee bokkam ci wotey 2024 yi. Aali Nguy Njaay tamit dafa géddoon Nguur gi keroog bi Maki Sàll tànnee Aamadu Ba muy lawaxu Bennoo Bokk Yaakaar.

Nii la Càmm gu bees gi tëddee :

Aamadu Ba, jëwriñ ju mag ji

Aysata Taal Sàll, jëwriñu Yoon wi

Ismayla Maajoor Faal, jëwriñu mbiri bitim-réew ak saa-senegaali bitim-réew

Sidiki Kaba, jëwriñu biir réew mi

Mamadu Mustafaa Ba, jëwriñu ngurd meek nafa gi

Aamadu Mansuur Fay, jëwriñu dem beek dikk bi ci suuf ak “désenclavement”

Sàmba Njóobeen Ka, jëwriñu mbey mi, jumtukaayi kow geek dund gu doy gi

Duudu Ka, jëwriñu koom-koom gi, Naal beek Koppe gi

Séex Umar Aan, jëwriñu njàng meek njàngale mi

Musaa Balde, jëwriñu njàng mu kowe mi, gëstu geek coste gi

Mariyaama Saar, jëwriñu njàngul liggéey, tàggatu geek xëy yi

Sëriñ Mbay Caam, jëwriñu ndox mi ak cetal gi

Faatu Jaane, jëwriñu jigéen ñi, njaboot gi ak kaaraangeg xale yi

Xemes Ngom Njaay, jëwriñu wér-gi-yaram gi ak ndimbalug mboolaay gi

Umar Saar, jëwriñu mbéll yi ak xamtug biir suuf (sewolosi)

Antuwaan Feliks Abdulaay Jom, jëwriñu soroj bi ak laf yi

Antuwaan Mbeng, jëwriñu naawaan gi ak barab yi ci aju

Aliyun Ndóoy, jëwriñu Kéewnga gi, Yokkute gu sax gi ak Coppiteg Mbindaare mi

Paap Saañaa Mbay, jëwriñu Napp gi ak Koom-koomu géej gi

Sàmba Si, jëwriñu Liggéey bi, Ndiisoog mboolaay gi ak Jëflantey Campeef yi

Abdulaay Séydu Sow, jëwriñu Taax gi, Dëkkuwaay yi ak Cellalug bokkeef gi

Abdu Kariim Fofana, jëwriñu Yaxantu gi, Njariñoo gi ak Lijjanti yu ndaw yeek yu yemamaay yi, yor kàddug Càmm gi

Mustafaa Jóob, jëwriñu Yokkuteg isin yi ak isin yu ndaw yeek yu yemamaay yi

Umar Yul, jëwriñu làrme bi

Terees Fay Juuf, jëwriñu Yokkuteg mboolaay gi, Dimbalante gi ak Yemale gi biir mboolaay gi ak mberaay gi

Viktorin Ankedis Ndey, jëwriñu mikorofinaas ak Koomug mboolaay geek jàppalante bi

Móodu Jaañ Fadaa, jëwriñu “Collectivités territoriales” yi ak Yokkute geek Yembalug  mberaay gi

Paap Maalig Nduur, jëwriñu Ndaw ñi, Lijjanti gi ak Liggéey yi

Maam Mbay Kan Ñaŋ, jëwriñu wërteef gi ak Po yi

Aliw Sow, jëwriñu Mbatiit gi ak Bokk-moomeelu mboor gi

Musaa Bookar Caam, jëwriñu Jokkoo gi, Jollasukaay yi ak Koomug xamteef gi

Galo Ba, jëwriñu Liggéeyu Bokkeef gi ak Coppiteg Fànnu bokkeef gi

Biram Fay, jëwriñu “Artisanat” bi ak Coppiteg liggéey yees yoonadil

Anet Sekk, tof-jëwriñ ci jëwriñu mbiri bitim-réew ak saa-senegaal yu bitim-réew, Yor mbiri saa-senegaal yi nekk bitim-réew

Allaaji Momar Sàmb, tof-jëwriñ ci jëwriñu Yoon wi, Yor mbirum àq ak yelleefi doom-aadama ak Njiite gu jub gi

Daawda Ja, jëwriñu Càmm gi ak Njureefi mala yi

Lat Jóob, jëwriñu Tàggat-yaram

Paap Aamadu Njaay, tof-jëwriñ ci jëwriñu dem beek dikk bi ci suuf ak “désenclavement”, Yor liggéeyu raay yi

Mamadu Saaliw Sow, tof-jëwriñ ci jëwriñu Biir réew mi, Yor Kaaraangeg jegewaale gi ak Kaaraangeg maxejj yi

Isaa Jóob, tof-jëwriñ ci jëwriñu ndox mi ak cetal gi, Yor wàllu fagaru ak Caytug mbënn mi

Ginnaaw loolu, Njiitu réew mi dafa xaatim beneen dekkare bob, tabb na ci kii di Muhammadu Maxtaar Siise, def ko bëkk-néegu Njiitu réew mi.

Pap Aali Jàllo
Plus de publications

Widewo

Xët yi mujj