Mbirum Aamadu Sàll, doomu Njiitu réew ma woon (Maki Sàll), mi ngi wéy di lëmbe réew mi. Nde, dañu ko tudd ci luubalug alal. Dafa di sax, tay jii, 7i fani me 2025, la waroon wuyusi àttekati “Pool Judiciaire Financier”. Waaye, ci li yéenekaay Source A xamle, moom Aamadu Sàll ma nga Etaasini, wuyusiwul te fasul ko yéene. Waaye, dafa am lu bees ci mbir mi. Mooy waykat bu siiw bees ci tudd, Waali Bàllaago Sekk, ak doomu Aamadu Ba mi fi woon elimaanu jëwriñ yi, Ibraayma Ba.
Yéenekaay Walfadjiri quotidien moo xëyee xibaar bi ci xëtu bu njëkk. Li sunu naataango yi xamle mooy ne, tofu toppekatu Bokkeef gi moo woolu waykat bii di Waali Bàllaago Sekk. Waaye, ba tay ci li yéenekaay bi xamle, yemul rekk ci woolu ko. Nde, dafa sàkku ci ñu “inculper” ko, maanaam ñu tuumaal ko, te daldi ko dóor “mandat de dépôt”. Kii di Ibraayma Ba tamit, di doomu Aamadu Ba mi fi woon elimaanu jëwriñ yi, lu ni mel la toppekat bi sàkku ci moom. Am na ku leen ñetteel, mooy Séex Tijaan Sekk mi nga xam ne, mooy dawalkatu Aamadu Ba mi ñu tudd léegi. Yemu ca de. Ndaxte, Samiwel Saar mi fi woon jëwriñ ca Nguurug Ablaay Wàdd, Mamadu Si, Saaliw Silla ak Baabakar Ñaŋ, ñoom itam, ci ñees woolu lañu bokk.
Li “Poolu Judiciaire Financier” di toppe gàngoor gees lim ci kaw mooy lees di wax ci tubaab “association de malfaiteurs en groupe criminel organisé, blanchiment de capitaux commis par un groupe criminel organisé”. Maanaam, ci wolof, mbooloo mu ànd def i ñaawteef ak i pekke, daldi weexal ay koppar yoy, lewu leen.
Jubluwaayu toppekat bi mooy, ci li Walf quotidien siiwal, “jàpp képp ku kootoog Aamadu Maki Sàll ci xaalis bi lu doon dugal ak a génne”. Centif moo luññutu ci mbir mi, bind ag caabal, fésal ci njombey luubalug koppar gu tollu ci 125i miliyaari FCFA. Dafa di, ginnaaw caabal ga ñu njëkkoon def, waa Centif dañu ci toftal geneen gu ñu jébbal waa PJF ca njeexitalu weeru màrs wee nu génn. Cig pàttali, ci caabal googu lees sukkandiku ba jàpp kii do Farba Ngom mom, ba nëgëni, mi ngi ci loxoy Yoon.
Ci lees wax nag, doomu Maki Sàll ji mooy ndeyu-mbill ji ndax moo nekk ci xolu njombe yi. Moom nag, wuyusiwul. Nde, moo nga fa réewum Donald Trump. Bu dee Waali Sekk nag, li toppekat bi njort mooy ne dafa laale ci mbir mi, maanaam dafa jot ci xaalis bu taq suuf boobu, moom ak ki ñuy wax Mamadu Si. Samiwel Saar moom, 200 miliyoŋ lañu njortagum ne laale na ci. Moom sax, jamono jii, ma nga kaso ci sababu meneen mbir.
Ibraayma Ba tamit, doomu Aamadu Ba ji, dañu wax ne dafa bokk ci kërug liggéey gii di SCI-CTS te Séex Tiijaan Sekk, dawalkatu baay bi, jiite ko. SCI-CTS nag, dafa bokk ci jaaruwaayi xaalis bu lewul bi ñu leen di tuumaal.
Bu ko defee, ngir ñu leeral mbir mi, toppekat bi dafa sàkku ci ñu wóolu leen ñoom ñépp, déglu leen, tuumaal leen, dóor leen “mandat de dépôt”, waayeet téyandi seen i alal fii ak luññutu giy jeex.
