Démb ci guddi, Maymuna Nduur Fay dafa bëggoon a dalal Majambal Jaañ ci jotaayub laaj-tontu, foofa ca teleem bii di 7tv. Waaye, sàndarm yi bàyyiwuñu ko mu amal jotaay bi. Nde, ca tele ba la ko sàndarmi birigàddu Wakaam fekk, dakkal jotaay bi, jàpp ko yóbbu. Kii Baabakar Faal mu RFM tamit, mi ngi ci loxoy yoon jamono yii. Ndax, moom itam, li ñu tere woon Maymuna Nduur Fay ci guddig démb ji, moom la def ci yoor-yooru tay jii. Ndaxte, dafa séq ak Majambal Jaañ ab laaj-tontu, jàllale ko.
Ñaari tuuma lees gàll ci ndoddu Maymuna Nduur Fay. Tuuma ju njëkk ji mooy salfaañe kaaraangeg réew mi, ñaareel bi di salfaañe kilifteefu yoon. Layookatam bi, Meetar Allaaji Aamadu Sàll a ko xamle.
Bu dee Baabakar Faal (njiitul naali RFM), moom itam jàpp nañu ko tay. Ma nga ca Pólis sàntaraal bu Ndakaaru ñu téyandi. Moom, ca biir màkkaanu RFM lañu ko fekk, jàpp ko. Moom nag, dafa jàllale ab laaj-tontu bu mu amal ak Majambal Jaañ. Lees koy tuumaal, ci lees wax, mooy doxalin wu mën a salfaañe kaaraangeg réew mi, saabal ay dég-dég yu wéradi, làqug saay-saay, xotti wormay kilifay yoon ak kootoo.
Cig pàttali, yoon dafa nekk di wër Majambal Jaañ jamono jii. Ndax, dafa am lu ko yoon di toppe. Bi ñu ko wooloo nag, dafa daw, génn réew mi, toogi Farãs. Jamono jii, yoonuw Senegaal dafa ko jàpplu fépp fu mu nekk ci àddina si. Bésub 4 nowàmbar la àttekati Farãs yi di xool ndax dañu koy jébbal Senegaal am déet.
