Ñaari njàngaani CEM Saare Koli Saale ñoo faatu ci ndog mu metti ci gaawug tay jii, 3eelu me 2025, fa Welingara. Biis bi ñu yéegoon moo mbëkkante ak ak genn sëfaan. Wëliis ñaari bakkan yi ci rot, am na ñu bari ñu ci jële ay gaañu-gaañu. Njëwriñu Njàngale moo génne ab yégle di ko ci xamle.
Ñenn ci njàngaani CEM Saare Koli Saale yi (Welingara, diiwaanu Koldaa) dañu doon amal tukkib gëstu ca benn làkk bu nekke fa Saare Caali. Tukkib gëstu boobu nag, mi ngi aju woon ci naaluw PFPI (Projet de Formation Professionnelle et d’Insertion). Fanweer ak juróomi njàngaan ñoo nekkoon ca biis ba leen doon yóbbu, ñu àndoon ak ki leen di jàngal ak dawalkat ba. Ndeysaan, gone ya mujjewuñoo àgg. Ndax, am ndog a leen dab ca yoon wa, fa weti Welingara, diiwaanu Koldaa. Bees sukkandikoo ci dég-dég yi rotagum ñeel ndog mu metti mooma, 2i xale gaañu nañu ca, mu am itam yeneen i xale yu amey gaañu-gaañu yu mettee metti.
Ba ndog ma amee, wallukat ya ak fajkat ya féete foofa gaawtu nañu ci taxawu way-loru yi, daldi jàllale ñi ci ame ay gaañu-gaañu fa raglub diiwaanu Koldaa ba, raglub diiwaanu Tàmbaakundaa ak bérébu fajukaay bu mag bob Welingara.
Jëwriñu Njàngale mi, Mustafaa Màmba Giraasi, biral tiis ak mettit wi mu ame ci ndog mile, jébbal njaalam njaboote yi ci deele ak ñépp ñiy yëngu ci njàng meek njàngale mi.
EJO ak LU DEFU WAXU ñu ngi jaale mbokki njàngaan yi ci faatu, di jaale ñépp ñi féete ci fànnu njàng meek njàngale mi, te di ñaanal xale yi ci faatu yépp.
