Elaas Ndaan Jaañ, njiitul SONACOS li, yégle na xibaar buy neex Saa-Senegaal yi, rawatina waa Kawlax. Nde, dafa xamle ne, isinu Linjaan bi nekk Kawlax day waaj a ubbi.
“Jàpp nanu ne, isin bi dina tàmbaliwaat liggéey bi ciy fan yu néew. Tay, ci kàttanu Yàlla, bi nu toogee ba léegi, jot nanoo liggéey ngir yékkatiwaat ndefar gi, tàmbalee ko ci cegg bi (raffinage) ca isin ba nekk Ndakaaru. Te yit, def nanu liggéey bi war ci yeneen isin yi.”
Kàddu yii la njiitul SONACOS li yékkati. Mu rax ci dolli ne, ci ayu-bés yii di ñëw, isin yi nekk Luga, Njaaréem (Njurbel) ak Sigicoor dinañ door liggéeyu diwlin bi. Te sax, ciy waxam, kàmpaañ yi dañuy door ci ayu-bés bii, fa Kawlax, te dinañ dem ci diirub weer ak lu teg.
Elaas Ndaan Jaañ waxaat na ne :
“Noo ngi am yaakaar ci ne, fii ak diggu weeru nowàmbar, liggéey bi dina door fa Kawlax. Te, ku wax liggéey, waxaale xéy, yeesalu kippug liggéeykat yi ak ndollentug maanaa.”
Bi muy wax lii, moom Sëñ bi Jaañ, dafa doon tontu laaji saabalkat yi, démb, ci bésub “Setal sunu réew” bi. Ndax, waa SONACOS, ñoom, dañu doon set-setal seen isin biy saytu doomi gerte yi. Mu waxati ne :
“Danu fi fekk li ngeen xam. Waaye, loolu warul doon ci nun aw lay ngir wax ne dañuy sànni isinu Linjaan bi.”
Njiitul SONACOS li xamleet ne def nañ li war ngir isin bi mën a dox, di liggéey diwlin bu baax te doy. Waaye, duñu fa yam. Ndaxte, dafa neeti, SONACOS bi mu jiite moo liggéey ciw naal wow, daf ci lënkaloo ak i digaale. Li ñu ko dugge mooy yokk doole SONACOS, yaatal ko ngir di defaral askan wi diwlin bu mucc ayib, doy, te njëg li jàppandi ci njaboot yi. Bu ñu jógee ci loolu, ciy waxam, dinañ song tabaxi Sonacos yi, yeesal leen.
Bu mébétu Elaas Ndaan Jaañ àntoo de, ceeb nar na a niin.
